Ki kynthei, ha ki dorbar shnong

Ka Meghalaya High Court, ka la pynmih ia ka rai, ha ki khyndiat taiew ba ladep, ban ailad ia ki kynthei ban ia jied Rangbah Shnong, ha ka shnong Nohwet, kaba don ha ka Raid Rangnah jong ka Hima Khyrim.

Kane kam dei ka rai, kaba nyngkong, hynrei, ki la don lem, kiwei ruh ki rai, ba ladep shim kham mynshwa, ba ka kashari, ka ailad ia ki kynthei, ha ka kam dorbar shnong bad kane, kan sa nang iai bteng ter ter shakhmat.

Ban iakren hapdeng ka kynthei bad u shynrang, ka don ka jingiapher ka bym long shuh ban ia kren; hynrei ha kane ka juk khulom, ba ka tulop ka ioh bun ka kynthei, ia u synrang, ka wan ka jingmut ban pyn ia ryngkat kyrdan.
Hynrei lada ia kren ia ka jing iapher, naduh ka dur met, haduh ka bor, haduh ka main shynrang, ka main kynthei, ka bym don kyntien ban iatai satia, namar, ba ki dei ki jingthaw ba kynsai jong U Blei.

Ki kynthei, ki la sdang ban rung ha ki dorbar shnong, hynrei, ngi iohi, ba kim pat ioh lad ban rung ha ki balang, ba ngim pat ju iohi ia ki Phadar kynthei, ki Pastor kynthei lane ki nongshat nongkhein kynthei, ha ki nong ialam ha ki seng Khasi, sein Raij bad kumta ter ter.
Ka kashari, ka la shait pynjem toin, ia ki dorbar shnong, haba don ki khep, ba ka ioh lad bad ngim dei ban klet, ba dang ha u snem 2015, ba ladep pynduh bor syndon ia ka iktiar ki dorbar shnong bad kane kaba shim mynta lei, ka dei tang ka jing pynbeit ia ki kyndon treikam ha ki dorbar shnong; hynrei ha kaba kum kane ka mat, ka jing shisha, ka kdew ba mangi ki paidbah, ngi jied ia ki dkhot sha Khasi District Council, da kiba kwah burom ban kiew kyrdan MLA bad kitei kim ju rung ha ka jabieng jongki, ban peit ia ki riti dustur, hynrei ki beh thong, ban ioh sam skhim bad kiew kyrdan MLA.

Haduh mynta, kiba bun ki shnong, kim tip, ia ki ain dorbar lajong bad ki shu ia rai dorbar, katba lap katba shem bad katba sngew iahap, ki nongshong dorbar bad bunsien, ki rai dorbar, ki ia tyngkhuh kawei ia kawei pat bad kane ka dei, ba kam don ka ain kaba shai, halor ka bor jong ki Rangbah Shnong lane ki dorbar Shnong bad ka dei na kane ka daw, ba ka kam dorbar shnong, ka shu kylla kong kam tasama suda.