Ki komiti pynbeit pud ka sorkar Jylla

Ka sorkar jylla, ka la thaw ha ki khyndiat sngi, ba ladep; ia ka komiti pynbeit pud bad ka Assam, ha kaba ia ka komiti kaba sha Ribhoi, la khlieh da U Bah Prestone Tynsong, u symbud myntri rangbah ka jylla, nangta ia ka komiti sha West Khasi hills, la khlieh da U bah Renikton L Tongkhar, myntri kam um bad nangta ia ka Jaintia hills, la khlieh da U Ma Sniawbhalang Dhar.

Kitei ki lai ngut, ki nongialam haneng, la shim, ba kin dei ki riew shemphang, ki riew pule kot bad kiba smat ban leit sha kitei ki jaka jing ia kynad bad ki dei ban tip, ia ka jinglong jingman jong ka jaka, ba ia knieh bad ki dei ruh ban lah ban ia thalain bad ki myntri lane ki MLA jong ka Assam ruh.

Ia kitei ki komiti, la tip da ki kyrteng “regional committee” bad kumta, ka sorkar jylla, ka la dei ban thung da U Ma Dasakhiatbha Lamare, uba dei u myntri ka sorkar jylla, uba dei u nong mihkhmat na Ribhoi, ba un khlieh ia katei ka komiti, ha ka jaka, ba kin buh da u briew, uba nabar, ba un khlieh ia katei ka komiti; hynrei ka leit long noh da khongpong, ba ha ki ar tylli ki komiti, ki thung da ki trai shnong, katba ha Ribhoi, ki leit thung da u briew uba nabar.
Ha West Khasi hills, ha ka jaka jong U bah Renikton Lyngdoh, ki la dei ban thung da U Bah Brolsing Nongsiej, uba dei u myntri ka sorkar jylla, ba un ia phalup bad ki MLA na Assam bad nangta, ki dei ruh ha ka jing shisha ban kynthup ia U bah Metbah Lyngdoh, uba dei U MLA ka Mairang, ha katei ka thup.

Ha Jaintia hills, ngi kyrmen, ba U Ma Sniawbhalang Dhar, lem bad U Ma Lahkmen Rymbui, kiba dei ki arngut ki myntri ka sorkar Jylla, ba kin lah ban ia shut reng tyngeh bad ki MLA ka Assam, halor kane ka mat; hynrei, ka long pat kaba sngew lyngngoh, ba kumno U MLA na Khliehriat, uba dei ruh u myntri ka tnat Revenue, ba um shym don ha katei ka komiti, haba u dei ma u, uba tip ia ki jaka puta bad ki jaka ia kynad ha ka jylla baroh kawei.

Ki dkhot jong ka komiti, ki don ia ka jing kitkhlieh kaba khia bha, halor u pud u sam, namar kane ka ishu, ka dei kaba khia shibun bha bad lada kitei ki 3ngut ki rangbah haneng, ki shah pynbor ha ki khar Assam; hangta, kan buh ia ka jingma kaba khraw ia ki jaka puta jong ka Ri Khasi bad kan pynduh mynsiem ruh ia kito ki nongshong khappud, kiba ju ieng skhem bad ki para ri jong ka Ri Khasi.