Ki khar metor, ki la dei ban kham pynjem mynsiem ialade

Ka sorkar jylla, ka la dep shimti ia ka them metor, ha ki khyndiat sngi ba ladep, hynrei ki khar metor, ki la kren khor pynban, ha kaba ka jingkren, ka long kaba la dei ban pyn ngat ha ki kyndon, kiba kham eh, namar ba ki kren, halor ka jing ialeh ha ban da iap, ka ishu iapher niam bad kiwei.

Kitei ki jait jingkren, ki long ki bym bha ne ki bym sngew tynnad, namar ba ha ka imlang sahlang, kam ju don kano kano ka mat, kaba lait na ka jing iakren bad tang u briew, uba pdiang ia ka jing iakren, wat la u shah rai pynrem borabor, hynrei, u ju ioh hi khyndiat ka jing myntoi.

Ki khar metor, lada dei ia ka Harijan Panchayat Committee (HPC), ki la dei ban iakren ia ka sorkar jylla, halor katei ka mat, haba ka don ka jing pynkhreh, ban pyn kynriah ia ki, na katei ka jaka bad ha kajuh ka por, ki dei ban pdiang, ba katei ka jaka, kam dei shuh mynta, ka jaka sah briew, ha kaba sawdong jongka, ki la don da ki dukan suda, naduh na Motphran, sha Mawlonghat, sha Iewduh bad kumta kitei ki dei ki jaka khaii pateng suda.

Lehse, ka dei ka jingkhein sting jong ka HPC, ba katei ka thain, ka ju pynwit bad pyn ijli shi katdei ia ka leit ka wan jong ki paidbah, ha kaba la ju lap (kham mynshwa), ia ki briew, kiba leit eit leit jung harud surok, kiba bret jaboh jabain, kiba die dukan die madan, kiba thaw ia ki dukan bad tei ia ki iing ki sem bad nangta sa ki kam khaii ba har rukom bad nangta sa ka jingjrong kti jrong kjat ia kiba leit ba wan bad ka nuksa, kaba ngi dang ia kynmaw bha, ka dei ka jingshah shoh u nongniah Bos, ha u snem 2018.

Ki khar metor, ki dei ruh ki bar jylla bad kumta ki hap, ha ki kyndon ba la mana, ba kin thied jaka puta lane halor ka nongrim jong ka Land Transfer Act bad lada ki la thied ne ioh sngewbha ruh, ki hap ban sngewthuh, ba ki la tare ruma, namar ba ka ain, ka la dep khang lypa.
Ki la don shibun ki jingjia, ha katei ka jaka; kiba pynkhie thma, ha ki bunsien ba ladep; ia ka sor Shillong bad ngim dei ban klet, ia ka thma jong u snem 2018, kaba la pynthut shi katdei ia ka suk ka sain jong ka Ri Khasi bad kumta, ka la dei, ban kynriah noh ia ki briew, na katei ka jaka, na bynta ka jingkhuid jingsuba, ka jing pyn itynnad ia katei ka jaka bad ia ka jingshngain ka nongbah Shillong.