Ki kashari shnong

Ka la mih ka jing iakren ha ka dorbar jong ka Khasi District Council, halor ka jing bym trei kam shuh, kiba bun bah ki kashari shnong, lane ki Village Court, lane ba la buh da kawei ka kyntien, kum ki Additional Subordinate District Council Court.

Kito ki Syiem, ki Sirdar, ki Wahadadar, ki Dolloi bad kiwei, ha ka por ba ki ioh ia ka sanad na ka Council, ka la don ka jing batai kaba shai, ba ki dei ban don ia ki kashari shnong, ha ka jingtrei kam jongki bad ba kin phah ruh ia ki dkhot jong ka kashari sha ka Council.

Na ka jubab jong U CEM, ka paw shai pynban, ba kiba bun, na kitei ki kashari shnong, kim trei kam bha satia bad katei ka dei ka jing pynkhein ia ka sanad jong ka Council bad nangta, sa ka jing khanglad ia ka jing ia kren u tymmen u san, lyngba ka jing ia syllok halor ki kam kiba lah ban ia beit hapoh shnong, lane lyngba kitei ki kashari shnong.

Ngi im ha kine ki sngi, ha kaba la imat, kumba ki bor shnong, bor thaw, kim kwah shuh ban pynlut por, ha ka jing ia shut jabieng, ia ka bha ka miat jong u paid nongshong shnong, hynrei la shu ia beh tang ia ki kam, kiba don jing iasnoh bad ka pisa suda, kum ki skhim sorkar ban ioh ia pyntrei bad kiba bud bad ka jing ia bam bad ka jing ia sam para nongtrei shnong; hynrei, la iohi, ba wat tang ban pynieng kali, ha ki surok shnong; ki bor shnong, ki pyn kitpop lut ia ka STP lane ka Shillong Traffic Police bad ia kiwei lei kiba kham heh, ki pynstet da ka jing ejahar sha ki thanat pulit bad hangtei, ba sa shu ia bunkam kai sha kashari, wat tang ia i kam iba rit eh ruh.

Ka District Council, ka la dei ban iateh bad ka Meghalaya Legal Services Authority, ba kin iarap ban ai ia ki riewsaid, haba ki don ki mukotduma sha ki shnong lane sha ki hima, lane ki Raid lane ki dei ban ailad ia ki samla kiba la nang la stad, ba kin long ki muktiar shnong, khnang ba ki mukotduma, kiba rai ha ki shnong, ki dei ban ieng bad iahap, wat lada dei ban leit shong bishar ha ki kashari ba heh jong ka jylla ruh.

Ki don bun jait, ki mukotduma, kiba dei ha ki kam ia knieh jaka, ka jing ia sam ia ka bhah jong ka kmie, ka jing ia tam pud, ka jing ia kajia shi iing shi sem bad kiwei, kiba lah ban ia said, ha kitei ki kashari shnong; lait noh, ki kam ia pyniap briew lane ki kam iashoh ia dat, kiba donkam ban tuklar mardor da ki bor pulit.