Ki kam thurmur jongka PWD, halor kasurok Shillong Dawki

Ka la long ka jingsngewsih kaba khraw ia kiba ieid ba thoin, halor ka jingduh noh jongki, ia ki arngut ki khlieh ka iing, ha ka jingtwa khyndew bad hap kali ha riat Rngain, ha ka sngi thohdieng ba ladep.

Hynrei katei kam dei tang kawei ka jingjia bad ngi dei ban kynmaw, ba ha u snem ba ladep, ki la don 3,4 tylli ki kali kiba la shah ban ha ka jinghap khyndew, ha ka bynta kaba kham harum, na kane kaba twa mynta bad katei ka jingjia, ka la dei ban pynkyndit ia ki bor pyniaid jong ka tnat PWD, ba ki la dei ban pynbeit kyrkieh, ia la ka jong ka iing, da kaba kin peit khohreh, ia ka jinglong jingman jong katei ka jingtrei surok, ba kin buddien ia ki kontraktor bad ba kin shim jingkhein ruh, la ka jingtrei, ka iaid suki ne ka iaid stet.

Kawei kaba sngewsih shi katdei, ka long ba ka tnat PWD, ka la aiti noh ym tang ia ka surok, hynrei ia ka jaka puta, sha ka tnat NHIDCL bad kata ruh, kam dei tang ia ka surok, kaba dang shna, hynrei, wat ia kato ka surok, ka bym dei satia ban shna thymmai; hynrei, la aiti sha ka kompeni bad katei kan ktah jur, ia ka jing maramot ha ki sngi, ki ban sa wan.

Ka jingtrei ia katei ka surok, ka dei kaba la shu shim, da ka ram na ka kompeni JICA bad ki nongleit nongwan jong katei ka thain, kin hap ban siew dalade ia katei ka ram bad kumta, ka jing kitkhlieh, kam dei sha ka NHIDCL, hynrei ka dei ha ka tnat PWD jong ka sorkar jylla.

Kumba ka long mynta, ki kontraktor, ki la sah shadien, na kaei kaba la ia kut, ba kin trei pyndep ia katei ka kam bad haba shu peit, la imat, kumba kan dang shimpor sa 10 snem eiei, haduh ban da pynbeit thik thak, ia ka surok na Shillong sha Tamabil; hynrei kam dei tang katta, la iohi, ba ka jingtrei ka suki tasam bad ka iaid lyngkhot lyngkhai, khlem ithuh ithaw shuh bad la iohi ruh pynban, kumba ka jingthmu kaba wan hakhmat, ka long ban ioh tih maw bad ban die sha ki mahajon bad ka jingthmu ban tih surok, kam shym la wan satia ha khmat.

Ka surok, ka la wan rah ia ki jingjia ba sngewsih bad ka PWD, ka dei ban siew bai lutksan sha kito kiba mad ia ki jingjulor ki kali lane ki jingiap jong ki briew bad ka donkam, da ka komiti kaba kyrpang, ha kaba ki trai shnong, ki dei ban donlang, na ka bynta ban peit ia ka jingtrei baroh kawei.