Ki kam pynroi, tang ban ioh spah ne ban ioh jingstad

Ha ki khyndiat sngi ba ladep, u heh duh ka UDP, ula pynsngew halor ka jing donkam, ban pynneh pynsah ia la ka jong bad ula ong shuh, ba ka kam pynroi, ka long kaba donkam, hynrei kam dei pat ruh, ban shu shaniah tylli, tang halor ka kam pynroi.

Katei ka jingkren, ka long kaba donkam bad kaba thew jngai shibun, ba mangi ki nongshong shnong jong ka jylla, ngi dei ban sngewthuh bad ban shemphang bad haba iakren ia kine ki mat, ngi dei ban pyn iapher, halor ka jingroi kaba paw shabar lane ka jingroi kaba buhrieh bad kane ka paw shai ia ka jingroi, kaba ngi iohi lyngba ki surok, lyngba ki jingkieng iaid kali ne ki jingkieng iaid kjat, nangta kiwei pat ki jingtrei kiba paw shabar; hynrei ki jingroi kiba ngim lah ban iohi, katba kiba ktah ia ka jingstad bad ka bor jong ki trai shnong, ki long kum ka jingdawa ia u pud u sam, ka ain Inner Line Permit, ka ktien Khasi, ka jing pynkhlain bor ia ki District Council bad kiwei de.

U paidlang ka jylla, u dei ban sngewthuh shai, ba ka jingroi kam don jingmut eiei, lada kam don ka jinglong trai lane kam don ka jing kitkhlieh, da ki trai shnong trai jaka bad ka jingshisha, ka long ba ha ka kyrteng jong ka jingroi, la jynrat lut ia ki iing ki sem jong ki briew, la kurup lut ia ki jaka puta bad ba ki iing ki sem jong ka sorkar ki ieng kynjreng, katba ki trai shnong, ki shong ha ki iing tap shiliang lane ki thiah bad ki bam ha ki lynti iaid kjat bad katei ka dei ka jingjia, kaba jia ha kine ki sngi.

Lyngba kitei ki jingshisha, kaba kongsan, ka long ba ka jingroi, ka dei ban iaid ryngkat ryngkat bad ka jinglong trai lane ka jinglah ban pynneh pynsah, ia la ka jong bad ba ka jingroi ka dei ruh ban long kaba ki trai shnong, ki lah ban trei dalade hi, ym ban shalan da kiwei kiba nabar.

Kaba paw mynta, ka long ba ka jingroi ka wan poi sha ki shnong ki thaw bapher, hynrei ki duk ki rangli, kim ju ioh bynta satia ia kitei ki kam pynroi, katba kiba ioh ban tare lane ban kamai na kitei ki kam pynroi, ki dei da ki katto katne ki heh spah heh hajar bad kaba kham ijli, ka dei, ba ki wan ki briew kiba na shabar bad dih lut ia ka umngap um thiang bad ka dei katei kein ka mat, kaba la pynsngew ba tang ka jingroi, kam don jingmut, khlem ka hok long trai ha la ka jong ka Ri.