Ki kam leh phoi, ki nong ialam Congress

U Ma Vincent Pala, u dang shu shimti ia ka kam nongialam Congress, hynrei, ka long kaba i shutia, ba kitei ki arngut ki nongialam ba rangbah jong katei ka seng, ba kyn thup ia U Ma Vincent Pala bad U Mukul Sangma, ki la ialeh phoi.
Kat kitei ki nongialam kiba la ih bha ka kyrdan jongki, ha ka politiks, lada ki ialeh phoi, kumne, kumta katno tam ia ki nongtrei jongki, kiba don ha ki lyngkha trei.

U Ma Vincent Pala, ula shimti ia ka shuki President, da ka hukum kaba na jrong, kaba mut, ba la jied da ka Sonia Gandhi bad ka jing kylli, hangne, ka long, ba balei kim lah ban jied ia U President, u ban iahun lang ki nongtrei jong katei ka seng lane kaba pyniaid da ka elekshon kaba shai bad lada ka iaid ha katei ka dur, ka pyni ba U Ma Pala, ruh, u hap iaid da kajuh ka rukom ban shu jied beit na khlieh ia ki nongialam ha ki District, ki Block bad wat ia ki kandidet MLA 2023.

Ha kawei pat ka liang, ngi iohi, ba mar ia shimti U Ma Pala, la leh phoi sa U Mukul bad utei u sing jong ka Garo Hills, um shym la leit ha ki jing ialang leh burom, ba la pyniaid da U Ma Vincent Pala bad kum u nongialam, U Mukul, ula dei ban nym pyni shabar ia la ka jingleh khyllung, da kaba u leit jaw ummat ha khmat ki nongthoh khubor, u leit kren ia ka jingsngew iapher ki Khasi, Garo; hynrei, ula dei ban burom ia ka hukum jong ka Sonia, kaba dei ka nongialam ba heh duh bad ban iakren ia kane ka kam hapoh jong ka seng bad ym ban ia sei shabar.

Ka elekshon, ka la jan bad kumta ka jing ialeh komik jong kitei ki arngut ki hati, kan sa jynrat ia bun bah ki phlang, kiba don ha ka ktem jong ka Congress bad ka la dei ia ki nong ialam, ba ha khlieh jong katei ka seng, ba kin bud noh da ka nuksa jong ka NPP ha ka elekshon 2023 bad kata ka long, ba uba lah ban wan rah kham bun ki MLA, un dei u nong ialam jong ka seng, wat lada un dei ban long myntri rangbah bad lada kham bun na Garo Hills, la hap ailad ia U Mukul bad lada kham bun na Khasi, Jaintia, la dei ban ailad ia U Ma Vincent bad da katei ka phormula, kan plie lad, ba kitei ki arngut ki nong ialam, kin iakhun tyngeh, ha la ki jong ki jong ki jaka, ban jop kham bun.

Kam dei tang katta, U Ma Pala, um da dei eh ruh ban put turoi than, ia ki katto katne ngut, kiba leit iasoh sha katei ka seng, namar ba ngim tip, na kitei ki saw, san ngut, kiba la pdiang sngewbha, la kin don ne em iwei arngut, ki ban jop elekshon bad ula dei ban wad ia ki kha heh bad katei kan kham sawa jur bha.