Ki kam khaii briew, ka seng NPP

Ha kane ka elekshon MLA 2023, ka NPP, ka long ka seng, kaba wan ha khmat duh, ha kaba thied MLA, lane kaba don bynta, ha ki kam khaii briew bad katei ka paw shai, ha kaba ka la thied noh ia bun ngut ki MLA, na ka seng Congress, ka la thied ia ki MLA jong ka TMC; hynrei, kaba ijli tasam, ka long pynban, ba kane ka seng, ka long pleng ka daw, ban pynpait pynpra bad pynduh pyndam, ia ki paralok lajong, kiba la kyrshan hun mynsiem, hadien ka elekshon MLA 2018 bad kitei ki kynthup ia ka seng NPP, PDF.

To ngin ia kynmaw, ba ha ka elekshon 2018, ka Congress, ka jop haduh 21ngut ki MLA, katba ka NPP, tang 19ngut, hynrei ka HSPDP, kaba don 2ngut ki MLA, ka leit iasoh sha ka sorkar MDA, ba ialam da ka NPP bad kumjuh ka PDF, kaba don 4ngut ki MLA.

Hynrei kitei ki ar tylli ki seng, ki la shah pharia ha ka NPP, ha kaba ia ka PDF, ka kad arliang wak bad kumjuh ia ka HSPDP bad mynta ka HSPDP, kam don MLA shuh, wat tang uwei ruh, namar ba ka la shah knieh noh ha ka UDP bad ka NPP bad katei kein, ka dei ka bainong jong ka jing kyrshan seng heh, ia kitei ki ar tylli ki seng tit na Khasi hills.

Ym tang katta, la iohi sa kiwei de ki kyrtong, kiba don ha kiwei pat ki seng sain pyrthei, kiba la shah thied noh ha ka NPP, kumba ka la jia dang shen ha Mawkynrew bad kat haduh mynta, ngi iohi, ba ka NPP, kam lah satia ban thied tang ia ki MLA jong ka BJP, UDP.
Kane ka dei ka buit, kaba ka Congress, ka ju leh bha, ha ki por, ba ka dang khie rasong ha ka jylla, ha kaba ia ki paralok lajong, ka dung nadien bad dei na kata ka daw, ba ki seng trai ri ha ka jylla, ki la shah pynjot thiaw ha ka Congress, ha ki phew snem ba ladep.

Kitei ki jingshisha, ki kdew ruh, ba lada ki MLA, ki dang shah thied, kumta katno tam ia u paidbah bapli bad lada ki MLA, ki shah thied da ki klur bad ki phew klur (kumba la ia bna paidbah ha kine ki sngi), kumta ki paidbah ruh, ki hap die ialade, da ki spah ne da ki hajar tyngka.
Kito ki MLA, kiba leit die ialade sha ka seng NPP, UDP, BJP, TMC, ki hap ban ai ia ka daw kaba shai bha, ba balei ki shet kylla, ia ki paidbah kiba la dep jied ia ki, ha u snem 2018 bad kaba i shutia ka long, ba wat kiba long myntri sorkar, ki dang kyntiap seng bad ngim tip, la kitei ki la ia kut lypa ne em ban ioh long minister biang ha u 2023, lada kin dang jop!!