Ki kali trai shnong, ban ialam ia ki nongshang kai pyrthei

Ka tnat shangkai pyrthei, ka la ioh ia ka jingmut kaba thymmai bad kaba kongsan bha bad kata ka long, da kaba ka pyllait ia 15 tylli ki kali, ha kaba sdang, ba kin kamai, na bynta ki nongshangkai pyrthei ha ka jylla baroh kawei.

Katei ka dei ka jingsdang, hynrei U Conrad Sangma, myntri rangbah ka jylla, ula iathuh ba yn thied kumba 500 tylli, kitei ki kali remdor Crystal Innova, ban kit ia ki nongleit kai sngewbha, ha kaba ka sorkar, kan bei mar shiteng na ka jinglut bad ki trai, kin siew shiteng ia ka ram.

Ka jingmut, ka dei kaba da bha eh bad ka dei ruh toi, kaba la dier por shibun eh bad katei kan plie lad ia ki samla kiba la mlien ha ka kam niah kali kamai, ba kin shimti ia katei ka kam, ba kin ioh kamai ialade bad ba kin siew ram ruh, sha ka sorkar.
Ka burom ka leit sha U Conrad Sangma, myntri rangbah ka jylla lem bad U bah Paul Lyngdoh, myntri ka Tourism, ba ki la ioh ia katei ka master plan bad ka sorkar jylla, ka dei ban iakren bad ki hotel bapher ha Shillong, ba kin shim ia kitei ki kali, haba ki nongleit jingleit, ki kwah ban leit shang suwari bad kam dei tang kata, ki don shibun ki myntri sorkar, ki ophisar jong ka sorkar India bad wat kiba wan na shabar Ri, ki lah ban pyndonkam da kitei ki kali kiba tip top.

Lyngba katei ka buit, kaba kynsai bha, ka sorkar jylla, ka dei ruh ban iateh lok bad ki kynhun pyniaid kali na Assam, ba kin ai kamai ia kitei ki kali jong ka Tourism Deparment ka sorkar Jylla bad ka dei lyngba katei ka buit, ba kan khanglad ia ki kali Assam, kiba la shim kabu bad knieh noh, ia ka bhah jong ki samla jongngi.
Ka tnat shangkai pyrthei, kam dei ban pynslem ia kane ka plan jongki, hynrei, ka dei ban pyniaid stet, namar ba katei lei kam dei satia, ka skhim kaba lehnohei; hynrei ka pisa, kan sa wan phai bad kan pynioh kamai ruh kham bun, na kaba ki pynlut bad kam dei tang katta, hynrei, kan ailad ia ki khun samla, ba kin ioh kam ioh jam bad kan dei ruh ka kamai, kaba plie wang ia ka jingmut jing pyrkhat jongki, ha kaba kin khie rasong ka kamai kajih, da ka spah kaba khraw tam jong ka kam shang pyrthei.

Kaba kongsan, ba ka tnat, ka dei ban leh, ka dei ka jing donburom ki nongniah kali, ka jingskhem kti jongki bad ban ai ka jinghikai kaba kyrpang, ba kin nang ban iadei bad ki nongleit nongwan bad tang katta, ka kamai lei, kaba heh bah, ka la don lypa ha kti.