Ki jylla ba shathie, kim ju jied ia ki seng heh

Ka India, ka la jan dap 75 snem kynthih, hynrei ngi iohi, ba ka jingmut jing pyrkhat jong ka jingjied MLA, MP bad kiwei, ka pher shibun eh, ha kaba iadei bad ki jylla ba shathie bad kitei ki long ka Telengana, ka Andhra Pradesh, ka Tamil Nadu, Kerala bad kine ki jylla, la iohi shai ba kim ju jied satia ia ki seng heh ka India.

Mynshwa, ha ka por jong ka Congress ruh, ngim pat ju lap, ba kin jied ia katei ka seng bad mynta, ha ka por jong ka BJP ruh, la iohi, ba ki nang jngai nang jngai ialade.
Ka Andhra Pradesh, ka don mynta ha ka jing synshar jong u khynnah, U Jagan Mohan Reddy jong ka YSR Congress bad nangta ha Telengana, la synshar da U Chandrashekhar Rao jong ka seng Telengana Rashtra Samiti bad ha Tamilnadu, la synshar dang shen, da ka AIADMK bad mynta sa ka DMK bad ha Kerala, la synshar da ki kynhun Left; bad ka Congress, BJP; kim shym la ioh lad satia ban rung ha katei ka jylla.

Ki jylla ba shathie jong ka India, khamtam ka Tamil Nadu bad ka Kerala, ki dei ki jylla, kiba la bun kiba nang ba stad; tangba kitei ki jylla, ki don ia kawei ka jinglong bad kata ka long ba ki burom ia la ka jinglong kyrpang jongki, lane ka kolshor bad ki ieid ia la ka ktien bad kitei ki dei ki mat, kiba la ju mih bha ha ki jing ia tyngkhuh na ka por sha ka por bad ka sorkar India bad wat la kitei ki jylla, ki dei ki jylla jong ki hindu, hynrei, ki shim, ba ka dustur ka riti, ka ktien ka thylliej, kam lah ban ia bujli, ha ka jingsngew niam bad ka jingsngew politiks bad ha ki, ki sngewthuh ba ka hindi, kam dei ka nongrim jong ka jingieid niam ne ka jingieid ri, hynrei ki dei ban ieid shwa, ia la ka jong ka ktien bad ki kren ruh, da ka ktien shnong jongki hi.
Ki seng heh, kum ka Congress lane ka BJP, ki ju ioh lad eh hi ruh ban nion ia ki jylla kiba duk, kum ki jylla shatei lam mihngi, kiba shaniah lut nadong shadong, na ka jingbei pisa ka sorkar India, hynrei ki jylla kiba heh bad kiba riew spah, kum ka Maharashtra, ka Tamil Nadu, ka West Bengal, kim donkam ban pyndem niuhmat ialade ha kitei ki seng heh, namar ba ki dang bei pisa toi ma ki ia ka sorkar India.

Ka jingeh ia ka thain shatei lam mihngi, ka long ba ngi lah ban ioh, ia ki jingroi ha madan, hynrei ngi la nang duh nang duh ha ka jing sngew kitkhlieh, ia ka jinglong trai lane ka nongrim, kaba ki ju ong, ba ngin ieng ha la ki jong ki kjat.