Ki hospital, ki la nang khapngiah ha Shillong

Na ka jingkren jong ki heh sorkar jylla, ha ki khyndiat sngi ba ladep, la iohi, kumba ka khlam corona, ka la nang kiew stet bad kata ka long (i) ba ka jingkhein, ka la nang kiew (ii) ba ki hospital, ki la nang khapngiah bad (iii) ba ki kamra icu ruh ki nang dap smam.

Kam dei tang katta, ka DC Shillong, ka shim ba ki don sa 25 shah, kiba don ia katei ka jingpang, nalor kiba la ai jingkhein man ka sngi bad lada ka long kumta, ka pyni ba na ki 450ngut kiba la tip, da ka sorkar, kum kiba don jingpang, hynrei kin don sa 25 shah lane kaba long sa 150ngut eiei, kiba khlem ioh jingkhein satia.
Ha kane ka kynti, la iohi ruh, ba ki don sa ki nong kyndong, kiba katei ka jingpang, ka la pur, wat la kim da jur satia, hynrei, la iohi, kumba ka jingpang, ka trei jubor ha ki jaka shit, kumba long ha ka them Ribhoi, ha kaba ki don bun kiba ioh pang, ha ki bun ki shnong.

Ka DC, East Khasi hills, ka la pyni, ia ki lad jing iada lane ki lad jing sumar, ha kaba ka la bthah ruh ia ki paidbah, ba kin ia deng mask thikna, na ka bynta ki 14 sngi shakhmat bad nangta, ka kdew ruh, ba uwei pa uwei u nongshong shnong, u dei ban sngewthuh ba u dei uba don ia katei ka jingpang, kaba buhrieh ialade shapoh bad kumta, u dei ban deng mask bad kiwei de ki kyndon ka koit ka khiah.
Kitei ki long ki kyndon jong ka sorkar, hynrei ha kajuh ka por, kam long ruh kaba suk, na ka bynta ban teh lakam ia kane ka khlam, lada ka jing ai jinghikai, lane ka jingsam jingtip, kam iaid kylluid sha ki paidbah, khamtam sha ki nong kyndong, kiba ki lad jing sumar, ki hiar haduh katta katta.
Na ka jingkren jong ki doktor, la iohi, ba ka jing ialeh ia kane ka khlam, kam da dei eh, ka dawai, hynrei, ka dei ka jing ia jngai iwei na iwei pat bad ka jingdeng thikna ia ki mask bad kitei ki jingtip, ki dei kiba ki paidbah, ki dei ban sngewthuh bad ym dei satia ban shu pynbor, namar ba kitei ki kyndon haneng, kim long satia kiba suk, ban pynbor, da kiwei pat.

Ka sorkar, ka la dei ban pyrkhat kyrkieh, namarkata, ban siew bai lut, ia kito kiba leit sah hospital, na ka daw jong ka khlam corona, namar ba ha ka jing kyrduh hospital, la hap ban leit kat shaba lap bad ki hospital jong ki riew shimet, ki long kiba remdor tasam, ha kaba tang shi taiew, lada leit sah, ka jinglut kan poi da ki lak tyngka, ha kaba uba duk, um don bor satia.