Ki hospital, ki la khapngiah, ki nongpang shaei kin leit?

Na ka jingkhein, kaba la sam paidbah, da ka tnat ka koit ka khiah ka sorkar jylla, la pyni, ba ki hos pital, ki la dap smam ha kine ki sngi, da ka jingbun eh, kiba leit shah sumar, na ka jingpang corona.

Ha ka sngi thohdieng, ka jing khein, ba la ai da katei ka tnat, ka pyni, ba ka Civil Hospital, ka don 115 tylli ki jingthiah, hynrei, kiba la pyndonkam, ki don 114 tylli, nangta ka Ganesh Das hospital, ka don 42 tylli ki jingthiah, hynrei, kiba la pyndonkam, ki long 40 tylli.
Kitei ki long ki hospital sorkar, hynrei, katei kajuh ka jing khapngiah, ka jia ruh ia ki hospital mission bad wat ia ki hospital jong ki riew shimet.
Hynrei hangne, ngin nym iakren than ia ka jing khapngiah jong ki kamra thiah bad ngi tip shai, ba ka tnat ka koit ka khiah, haba ka bate ia kitei ki kamra, ka la dep khein lypa, naduh kaba sdang ia ka bor jong ki doktor, ki nos bad kiwei ki nongtrei, kiba dei ban sumar ia ki nongpang, kiba pang paidbah lane ia kito kiba pang corona.

Hangne, ka wan ka mat, ba haba ki kamra ki la khapngiah, ki nong ialam sorkar, lane ki heh ka tnat ka koit ka khiah, ki tip shai ne em ba ki nongtrei jongki, ba kynthup ia ki doktor, ki nos bad kiwei ki nongtrei ruh, ki la khapngiah ki kti jongki bad kumta, lada plie thymmai sa ha kiwei ki jaka, ka jing kylli, ka long ba mano pat ki ban leit trei lane leit peit nongpang sha kitei ki jaka?
Khyndiat sngi mynshwa, ngi iohi, ba wat ka NEIGHRIMS, ka la dep kren ia katei ka mat, ha kaba ka ong, ba ka don ka jing duna briew, ha katei ka hospital bad kumta, ki doktor, ki nos katei ka hospital, kin nym lah satia ban leit sha kiwei pat ki jaka, wat, lada ka sorkar, ka la nang pynbun ia ki jaka thiah jong kiba pang corona.

Kane ka mat, kam donkam satia ia ka jing padiah tang ka ktien, hynrei, ka la dei ia ka sorkar jylla, ba kan pyrkhat khia bad kan pyrkhat jngai, ba kan nym poi sha ka jing lehrain, ha ki sngi, ki ban wan, lada shu buh, ba ka nang kiew ka jingbun ki nongpang, na kane ka khlam.
Ka jing sumar corona, ka la nang iaid, hynrei ka sorkar jylla, ka hap sngewthuh ruh, ba kiwei ki nongpang, ki la nang kiar, kaba leit sha ki hospital ha kine ki sngi bad ka dei na kata ka daw, ba ki la sdang bun kiba iap, wat ha iing ruh bad kumta, ki la dei ruh ban don noh, sa kiwei pat ki hospital, kiba dei ban sumar kyrpang ia kiwei pat ki jingpang, ba ki nongpang kin sngewshngain.