Ki dor jaka, ki la kynting sha suin; mynta tang ki dap klur ki ban ioh thied

Ka jingkiewdor ki jaka, ka la i shyrkhei sat ha kine ki sngi, ha kaba katba nang mih kawei ka sngi, sha kawei pat, ka dor ka shu kynting soit beit sha suin bad ka dor iew, kaba duna tam, la iohi, kumba ka long hapdeng ka T.200 haduh T.500 shi square phut, ha ki jaka kiba sharud sor lane kiba jngai surok; hynrei ha Shillong lane ha New Shillong bad ha ki khap sor, la iohi, kumba ka dor ka jaka, kan long hapdeng T.1000 haduh T.5000 shi square phut; hynrei ha kitei ki thain, ym don jaka shuh kiba lait bad ki la bun, kiba tyrwa beit da ki iing bah iing sah bad ki dor ki long kiba da ki phew bad wat da ki klur ruh.

Ka jingiakren hangne, kam dei ia katei ka jingkyrduh jaka, hynrei, ka mat pdeng, ka long, la ki riew paidbah kiba trei ia ki kam rit hapoh ophis, kiba khaii pateng malu mala lane kiba bylla, kin leit wad jaka thaw iing shano shuh, haba tang shu la iakren ia ka dor, ka donkam da ki phew lak bad da ki klur suda.
Kam dei tang ha sor, kane ka jingkiewdor, ka la bud ryntih shriak shaduh sha ki nongkyndong bah, ha kaba ka dor jaka, kam duna shuh sha ka T.200 haduh T.500 shi square phut lane kaba long antad T.10lak shi nongrim iing bad kane kein, ka la pyniapher noh hapdeng uba duk bad uba riewspah, namar ba uba duk, un shongwai shirta jingim lane un hap ban shong ha ki rud surok, ha ki khrum jingkieng lane ba ki shait ong ki “slum” ha ki nongbah kiba heh.

Ka sorkar India, ka la theh ia ka skhim shna iing, kaba shongdor haduh kumba T.15lak, hynrei katei kam don jingmut eiei ruh em, lada ki briew, kim don jaka ban shna iing.
Ka sorkar jylla, ki MLA lane ki MP, kim nud satia ban kren ia kane ka mat kaba kongsan bha, hynrei, ka por ka la dei eh, ba lada la thied jaka, da ki hajar klur ban tei ia ki karkhana dewbilat, ki krem dewiong, ki surok, ki ophis sorkar, ki kad liengsuin bad kumta ter ter, kumta ka la dei ka por ban wad ia ki jaka kiba biang dor, na ka bynta ba kin shong kin sah kine ki riew khlem iing bad la dei ban peit nuksa ia kito ki phew tylli ki iing, kiba ieng kynjreng haduh ha kine ki sngi ha Nongmensong, ha kaba la tei ha ka por jong ka sorkar Congress ha ki snem 80-90.

Ka jingroi briew, ka la nang jur ha ka ri Khasi baiar, hynrei kat nang bun briew, ki nang bun kiba duk bad kitei ki hap shaniah ha ki iing wai, lada dei ha sor ne ha nongkyndong ruh kumjuh bad wat ki iing wai ruh, kim dei shuh kiba tad, namar ba ka bai wai iing, ka la poi sha ka T.5 haduh T.10 hajar ha ka shibnai, khamtam ia kiba sah ha ki jaka pdeng jong ka nongbah Shillong.
Na kaba shu ia tip paidbah, kiba don jaka ha ki dong bapher ka sor Shillong, ki dei ki katto katne ngut ki heh spah bad kiba bun ki dei ki riew sain pyrthei, kiba la shu klun lut ia ki iing ki sem bad ki jaka puta bad ha kane ka dur, ngin sa iohi, ba kam slem shuh, ia uba bun u khun Khasi khara, ba un hap ban ia shong, ia thiah, ia bam ha ki khrum jingkieng, ki rud surok, namar ba kim don lad shuh ban wad ia la ka jong ka nongrim iing.
Sangsot ia ka lawei jong ki khun ka Ri, khamtam ia kito kiba shu thap ia u khaw iohei man ba kut bnai, lane kiba la shah pynhap ialade ha ka kyrdan jong ki below poverty line (bpl).