U bah Prestone Tynsong, symbud myntri rangbah ka jylla, ha ki khyndiat sngi ba ladep, ula kren shai ba kane ka sorkar Meghalaya Democratic Alliance (MDA), ka la pynkhlain bor ia ki District Council bad kawei na kita ka jingpynkhlain, ka long ha kaba ki la pynjlan por ia ka jingtreikam jong kine ki MDC, haduh hynriew snem kynthih bad lada ka long kumta, ka pyni, ba kane ka sorkar MDA, kan sa nang mlien ban pynjlan por ia ki District Council (lada kan wan biang) bad lada mynta 6 snem, kumta ha u snem 2029, kin pynjlan por syndon sha ka 10 snem kynthih bad katei ka dei ka buit pynkhlain bor jong kane ka sorkar MDA ia ki District Council ha ka jylla.
Nangta utei u rangbah, ula kynmaw ruh ia ka jingjia jong ki snem 2014-2015, ha kaba ka High Court, ka la bthat jynduh noh ia ka bor jong ki Rangbah Shnong bad halor kane ka bynta ruh, kaba ngi dei ban kylli bad ban pynkynmaw, ba utei u rangbah, u dei u myntri ka sorkar jylla, ha katei ka por bad ngim ju lah klet, ba ka don ka jing ia sylla kaba jur ha katei ka por jong U Mukul Sangma, ban dkhat ia ka bor jong ki Rangbah Shnong, ha kaba la khang ia kiba trei ophis, ba kin long Rangbah Shnong, nangta la buh kyrdan pule ruh bad ha katei ka por, ngi kynmaw, ba dei U Bah Adelbert Nongrum, uba dei U CEM, uba la shah tian bishar ha khmat ka kashari, halor ka jingthmu jongu ban pynurlong ia ka ain VAB.
Kata ka jingiakren ban pynthymmai ia ka Sixth Schedule, haduh mynta, ka shu sah ha rngai bad lehse katei ruh ka dei ka jing pynkhlain bor jong ka sorkar MDA ia ki District Council bad nangta kaba ap ia mynta, ka long sa ka ain Uniform Civil Code (UCC) ha kaba ka sorkar India, kan sa shim ia la ka jong ka rai bad kaba pynkut, kaba dei ka bynta jong ka jing pynkhlain bor jong kane ka sorkar MDA, ka dei halor kata ka ain Meghalaya State Investment Promotion and Facilitation Act, 2024, kaba ailad ia ki kompeni heh ba kin shim jaka, na ka bynta ba kin seng kam ha ka jylla bad katei kan dei ka lynti bah ia ki heh spah, ba kin kurup ia kiba bun ki jaka, da ka jingpynbiej pisa ia ki riew shimet kiba dei ki trai jaka bad kumta ki kompeni heh, kin tei ia ki paki dulan, katba ki riew paidbah, kin sa shong ha ki rud surok bad ha khrum ki jingkieng iaid kali, namar ba ym don ba lah shuh ban teh lakam, ia ka jingdie jaka pathar sha kito kiba mut ban wan plie ia ki karkhana, ne kino kino ki jingtreikam bapher ha u pud u sam jong ka Jylla.
Phi don ban ong eiei?