Ki Civil Sub Division, ki District ha ka Jylla

Haba phai ia ki rukom trei kam ha ka jylla, ngi don ia shibun ki mat bapher, ba la wan rah da ki sengbhalang, da ki seng sain pyrthei bad ki duna bha, ki kam, kiba ki riew paidbah ki iakren (lait noh, tang kito kiba ktah ia ki shimet shimet).

Kawei na ki jingpang kaba ki riew sain pyrthei, ki bang bha ban ia ktaid, ka dei ka District bad ka Civil Sub Division bad ngim ju kham iohi, ia ka ishu dawa District, Civil Sub Division, kaba kim don ki riew sain pyrthei, lada dei ha Mairang, Sohra, ha Mawsyn ram, ha Patharkhmah bad ha kine ki sngi, la iohi, ba ka Mawlai ruh ka la kwah Civil Sub Division bad lashai kan poi ka por ba ka Jaiaw, ka Mawkhar bad ka Laitumkhrah, kin ia dawa ia la ka jong ka bhah.

Kam dei tang kata, ka don sa kawei ka jingpang iabit kaba jur bha bad kata ka long ba lada mih District kawei ha Khasi, Jaintia, ka dei ban mih, sa kawei ruh ha Garo hills bad katei kan iabit raibi beit ha katei ka dur.

Lada ngi ia peit kai, ia ki ar tylli ki Civil Sub Division, kiba dang shu plie shen, ka Pynursla bad ka Ranikor Civil Sub Division, ngim tip, la kitei ki la poi shaei; hynrei haba shu peit nabar, imat tang ka ophis ruh, kim don, ki nongtrei ruh kim don bad ka kam jong kitei ki ophis, ka dei tang ha kaba pynmih hukum pyniaid kali, ai car lane korphiw pass (ha kine ki por covid) bad nangta sa kaba ai scheduled tribe certificate.

Ka jait bynriew, ka la dei ban iaid kham sha kynjang, na kane ka mat, kaba ki ju bang bha ki politician bad ha kaba kum kane ka por, ngi la dei ban peit ia ka jing shah ieh khunswet ki para ri jongngi, kiba don sha khappud, ha kaba tang ki ktem pulit ruh ngim don, nangta ngi la dei ban peit ia ka jing sahdien jong ki thain khappud, ha kaba kitei ki para ri, ki don ia ki surok, kiba dap da ka ktieh ahor bad nangta ngin peit sa ka ding ilektrik kaba biang ruh kim don bad nangta sa ka jinghiar ka rep ka riang, ka kamai kajih bad ka pule puthi.
Ka la dei ka por, ba ngin peit kham sha jngai, haba iakren ia ka roi ka par jong ka Ri Khasi Jaintia lane ka jylla hi baroh kawei bad ngi donkam ia ka jingshngain ha ki khappud, ngi donkam ia ki surok, ka umbam umdih bad ngim donkam ia ki ophis, kiba shu ieng tang ka kyrteng, katba ki bym ai jing myntoi ia u luk u lak.