Khynra laisen ka KHADC, ia ki draibar taksi bar jylla

Ha ki khyndiat sngi ba ladep, ka Khasi District Council, ka la pynlong ia ka jingkhynra laisen ia ki draibar taksi bar jylla, kiba kamai ha u pud u sam jong ka jaka trei kam ki District Council lane ki Sixth Scheduled Area.

Katei ka long ka khubor, kaba sngewkmen shikatdei, ha kaba U CEM jong ka Council, ula shim ia ka rai rangbah, ban khanglad ia ka jingpynkhein ain, ki nong kamai taksi bar jylla.

Ka District Council, ka don ia ka bor kaba khlain bha, kaba la ithuh da ka riti synshar ri bad ngi hap ban kynmaw, ba wat ka sorkar India, haba ka pyntreikam ia ka CAA ha u snem 2019, hynrei, kam nud ban ia pyni bor ia ka District Council bad ka pynbna, ban ailad ia ki mynder kiba buhai shnong, tang ha ki jaka Municipal jong ka jylla bad kumta ka la dei ka por, ia U CEM bad ka EC jongu, ba kin teh da ki kyndon kiba eh, ia ki bar jylla, ba kin nym iuhroit ia ka hok jongngi ki trai shnong.

Khyndiat sngi mynshwa, ngi iohi, ba ka la don ka jingkhynra ia ki dukan jong ki bar jylla bad hadien kata, ka bud sa ka jing khynra laisen ia ki nongniah taksi bad katei ka pyni, ia ka jingkhlain bor jong ka District Council bad ka dei ruh ban dang iai bteng, ia katei ka kam radbah jongka, ym ba kan shu trei pyndep rukom.
Ka Council, kam dei ruh ban pynkut tang ha kitei ki ar tylli ki bynta, hynrei, ka dei ban teh lakam ia ki kontraktor bar jylla, ki kompeni, ki nongtrei sorkar, ki nong kamai kali kum ki bos, ki trok, kiba shang makia, kylleng ka Ri Khasi Jaintia, namar ba kitei ruh, ki dei kiba wan shna pisa bad ki dei ban hap ha ki kyndon jong ka Trading lane ka Labour License.

Kam dei tang katta, hynrei ka Council, ka la dei ban buh thik, da ki kyndon kiba shai, ba ka dukan die khaw, kam lah ban die jain, lane ban die sikret; hynrei, ka dei ban don ka jingbatai kaba shai, ia ki jingdie, katba kum ki kyndon jong ka jingai laisen khaii bad nalor kata, ka dei ruh, ban peit ba ia ka kam niah taksi, kaba la bun ki trai shnong, bym dei shuh ban ailad ia ki bar jylla bad katei kan long ka jing kyrkhu bad ka jing myntoi ia ka kamai kajih jong ki trai shnong.
Kaba khatduh, ka long ba ki Syiem, ki Sirdar, ki Rangbah shnong ruh kim bit ban leh stad, da kaba nion ia ka muhor jongki, khlem da ioh jingmynjur da ka bor jong ka dorbar shnong.