Ka politiks, ka la nang jot ha satlak ka pyrthei bad ki don ar tylli ki daw bah, kiba pynjot ia ka sain pyrthei bad kitei ki long (i) ka jingdon ki business men ha ka politiks bad (ii) ka jing don bynta sa ka niam ha ka politiks.
Ka United States, ka dei ka ri, kaba stad ha ka pyrthei bad ka jingstad jongka, ka long, ba ka la weng noh ia U Donald Trump, na ka shuki President jong katei ka Ri, ha ka elekshon ha U Naiwieng jong u snem ba ladep.
U Donald Trump, um don kiwei pat ki kyrdan ha ka jinglong jingim jongu, ha katei ka Ri; hynrei u don ar tylli jinglong jongu (i) ki kam kynthei bad (ii) ka kam business jongu, ha kaba u dei uwei na ki heh spah, uba paw bha, ha ka Ri America.
Kat ka spah jongu, u shim ba un jop biang, da kaba suk ia ka elekshon President ha katei ka Ri, hynrei, u paidlang ka America, ula bret noh ia u sharud bad U Trump, ula lamwir kwah bor bad la iohi ba ha ki khyndiat sngi ba ladep, ula kynshuit ia ki nongkyrshan jongu, ba kin pyn kulmar, ia ka iing dorbar jong ka America lane ka Congress.
Hynrei ka synshar paidbah, ka long lahduh ha katei ka Ri bad ki nong kyrshan jong U Trump, ki la shah siat iap saw ngut bad ka dorbar, ka la rai ban pynjop don burom ia U Joe Biden, kum u President ba thymmai ka US.
Kumba lah ong haneng, haba ki business men, ki la rung ha ka politics, kumta ka synshar khadar bad ka shongsuk shongsain, ka la jot thiaw, namar ba kitei ki don ar tylli ki jinglong kiba hangamei jongki bad kita ki long (i) ka rhah spah bad (ii) ka rhah bor.
Kam kut tang katta, ka pyrthei, lane ka United Nations, ka dei ban ai takma kaba rem dor tam ia ka twitter, kaba la weng ia ka account jong U Donald Trump bad katei kajuh ka khusnam, ka dei ruh ban leit sha ki kotkhubor ha America, kiba la dep weng lut ia ki khubor, kiba thoh shaphang U Trump, hadien ka elekshon President jong U Naiwieng 2020.
U Trump, ula kren pohjait tyngeh ia ki kot khubor, da kaba u ju pyndonkam ia ka kyntien fake news; hynrei ka ktien, ka ong, ba uba rit u don la ka kylla, bad haba ki kynthah ki dkhiew, u kyllon pding u hati bad katei ka dei ka dak, kaba shynna bha halor ka jingleh thawsha bad leh donbor utei u heh spah rhahbor jong ka Ri America.
Shisha sieh ba ka long kumta