Khlad shi para, ba bat ka ilektrik

Ka jingjia, ka dei kaba sngew triem her, ba ki arngut shi para, kin shu iap ei khamakha, na ka daw jong ka jingleh sting ka tnat MeECL ha Umsalait jong ka thain Iooksi, ha West Jaintia Hills District.

Haduh mynta, ka MeECL, ka sngap mynthi beit jar, la imat, kumba kam tip eiei bad wat haba ka dorbar jylla, ka dang iaid, hynrei u myntri bor ding, um sngew iahap ne sngew dei ban iathuh halor katei ka jingjia ha khmat ki nong mih khmat paidbah.

Ka jing pyniap briew jong ka MeECL, ka dei kaba la jubor bad lada don kiba wad bniah, lehse, kan kham jubor ka jingiap, na ka jingtrei ka ding sorkar, ban ia ka bor jong ka ding mariang, kaba ju jia ha ka por lyiur.
U myntri bor ding, ula dei ban pynmih ia ka hukum kaba kyrkieh, ba kan don ka jing jurip lut, ia ki lain ding ha ka jylla baroh kawei bad ia ki jaka ba don ki transformer lane ki power line kiba khlain bor bad ban don ki jing iada kiba thikna ia ki riew paidbah.

Ym dei tang katta, ka la dei ka por ia ki nongtrei ka tnat bor ding, ba kin don ia ka controll room jongki, kaba 24 kynta, lada dei ha sor ne ha nongkyndong bad kitei ki dei ban don ia ki mobile number, ha kaba kitei ki number, yn pynmih ha ki kotkhubor bad kin don ha ka central controll room, ba ka jing iarap kaba kyrkieh, ka dei ban poi sha kiba donkam, haba duh ding, haba hap ki sainar ilektrik, haba bthei ki transformer bad kumta ter ter.
Ha kiba bun ki jaka, la lap, ba u nongtrei light, u trei tang myn sngi bad lada phi donkam, wat ia ka kam iap kam im, ha ka por mynmiet, yn nym don satia ki linemen, ki ban wan mih shakhmat ban iarap bad ka la dei ia ka tnat MeECL, ba kan pynmih ia ka kyndon kaba tyngeh, ba ka jingtrei ia ka ding, ka dei kaba 24 kynta pura.

Ka jingtrei ka tnat MeECL, kam shym la ai jinghun satia ia u paidlang ka jylla, haduh ha kine ki sngi, namar la iohi, ba ha ka jaka, ba kin pynbiang ia u paidbah, hynrei ki ia shrut bad ia woh nia pynban para ma ki, ha kaba ki nongtrei ruh kim lehrain shuh, ia la ki jong ki kynrad.

Ka la dei ka por, ba ngin pynshlur ia ki kompeni bor ding, kiba nabar, ba kin shim bynta lem, ha ka jingsam bor ding ia ka jylla, lehse kum ka jingsdang, lada ki don shwa ki kompeni, kiba rit, kiba ai ding ha ki bynta ka Shillong.