Khang sah ki iew khappud

Ka long ka jing lyngngoh kaba khraw, ba ka sorkar jylla, ka iai khang sah ia ki iew khappud haduh ha kine ki sngi bad katei ka jingkhang, ka dei kaba la bteng la ar snem eiei, naduh ba ka wan kane ka khlam corona virus.

Ha kine ki sngi, ka iaid ka ieng, ka leit ka wan, ka la sdang ban plie lut khoit, hynrei, kaba lyngngoh, ka long ba ia kitei ki iew khappud lane ki hat border, ba ym pat shym la plie satia bad kaba lyngngoh ka long ba wat ki MLA/MDC jong ka thain, ki ia sngap man man halor kane ka bynta, kaba ai ja kpoh, ia ki bun bun hajar ngut ki nong shong shnong jong ka thain.

Ki don ar ngut ki MP jong ka Ri Khasi Jaintia, U MP sha Lok Sabbha bad U MP sha Rajya Sabbha hynrei kitei ruh, la imat, kumba kim shym la rung ka jingmut jing pyrkhat jongki, ban iakren ia katei ka mat, kaba kongsan bha ia ka bit ka biang jong ki nongshong khappud.

Ka iew khappud, ka dei kaba kongsan bha ia ka bit ka biang jong ki briew kiba shong ba sah sha khappud bad ka Bangladesh bad la kynmaw ba ar snem mynshwa, ba U Conrad K Sangma, myntri rangbah ka jylla, ula ialam ia ki myntri jongu ban ia leit sha Dhaka; hynrei katei, la iohi, kumba ka shu kut noh kumto hi bad kam don kano kano ka jing myntoi ne ka jing buddien hapdeng ka jylla bad katei ka Ri. Ka Meghalaya, ka la kynjoh sha ka 50snem ka rta, hynrei, ki lad ki lynti, ki la nang shah khang pynban ia ki nong shong khappud, na kaei kaba ju long ha ki phew snem mynshwa, ba ka lad ka lynti, ka plie kyrhai, ba kin ia khaii pateng bad ka Bangladesh lane ka East Pakistan bad wat ia ka jing khaii sha Ri Bilat ruh.

Ka jing khanglad ia ki iew khappud, ka buh ia ka jingeh kaba khraw ia ka ioh ka kot jong ki nongshong shnong sha kjat ka Ri Khasi bad kam dei tang kata, hynrei ka pynduh noh ruh, ia ka jingiadei paralok hapdeng ka India bad ka Bangladesh; hynrei ka shu long noh, tang ka kyntien pyllait jynhaw bad kaba ailad tang ia ki katto katne ki heh spah, kiba don da ki jing khaii kiba da ki phew bad ki spah klur; katba ka bit ka biang jong ki ar khappud, ka dei ban long ka mat, kaba ki shipai khappud, ki dei ban iakren bha, ha ki jing iakynduh ba man ka por jongki.