Khang ia ki trai shnong, pyllait ia kiba nabar

U bnai jymmang 2021, ula dei uwei na ki bnai ba sniewbok ia u paidlang ka jylla, namar ba naduh ba dang sdang u bnai, la ia shah khang hi sbak.
Ka sorkar jylla, ka don ia la ka jong ka nia, ban pyllait met ialade, halor katei ka mat, katba ka dei kaba shisha, ba haba la khang, ia ka leit ka wan, ka trei ka ktah bad pyrkhing ia ka rung ka mih, kumta, katei ka ktah shibun ia ka die ka thied, ka iew ka hat bad ter ter.

Hynrei, ka don kawei ka mat, kaba hap ban iakren bad kata, ka long ba ha kine ki taiew, la khang sbak ia ki trai shnong bad la maham, ba kim bit ban mih wat tang shabar na la iing, ba ki dei ban deng mask, ha la iing bad ba ki jingthied jingpet, kin poi beit hapoh thliew iing, hynrei, ngi iohi pat ba ki sengbhalang, ki ia kem dkhar dain shi dain bad haba kumta, ka wan ka jing kylli, ba balei kine ki dkhar, ki ioh ban iaid laitluid?

Wat la ngi la tip ha kine ki sngi, ba ka khyrdop ha Umling, ka dei pleng, tang ka khyrdop ban peit ia kiba wan shangkai pyngngad, lane ba kam dei ka entry exit point (kumba ju ia kam bakla baroh shi katta), hynrei ngim tip, la kitei ki bar jylla, ki la shah test ne em ialade, ha kata ka tiar corona, kaba la ju ai kyrteng RT PCR, kaba dei ban ioh jingtip, hadien 48kynta.
Ha ki khyndiat sngi ba ladep, U Conrad Sangma, myntri rangbah ka jylla, ula pyn thikna ia U Himanta Sarma, myntri rangbah ka Assam, ba un ai lait lan ia ka iaid jong ki briew ne ki kali, kiba iaid lyngba jong ka jylla, ha kine ki sngi pakhang shnong bad katei ka long, halor ka jingbthah U Sarma, namar ba ka Assam, kam don pakhang shnong satia, wat la ka khlam, ka la poi sha ka 5 ne 6 hajar ngut ha ka shisngi shisngi.

Ka sorkar jylla, lyngba u symbud myntri rangbah, ka ju kren bha, halor kita ki nong bylla, kiba tbit lane ki skill labour, hynrei ka mat, ka long ba lada ki dkhar, kiba tbit, ki ioh ban wan bylla sha ka ri jongngi, katba ia ki Khasi, kiba tbit, la set noh ha ki kamra thiah jongki, kata ka long ka bym iahap satia.
Lada ia ki dkhar, kiba wan, la shim ba kim dei kiba wan rah jingpang, hynrei ia ki nong kyndong, kiba wan sor, ka khang sbak, halor ka jingtieng, ba ioh ki iabit jingpang, kumta, katei ka dei ka jing sngewthuh kaba bakla than.