Khajna ruh hap siew sha Delhi, dewiong ruh hap mynjur ka Delhi, leit klas ruh hap pas na Delhi

Ngi dang shu dep shen ban jied ia u dkhot jongngi ban leit sha ka dorbar Lok Sabha bad ngi dang ap result, sa ar taiew tam, ban tip ia uba jop uba rem; nangta ngi dang shu dep ruh ban jied ia ki dkhot jong ka dorbar jylla, dang shisnem tam mynta, hynrei ka mat kaba ha khmat duh, ba ngi dei ban sngewthuh kum ki riew paidbah, ka long, la ngi jied ia ki nongmihkhmat ba kin thaw ia ki ain, na bynta ka bha ka miat jong u paidlang ka jylla lane, ba kin shu leit pynban ban pyndem lut ia baroh ki hok jong u paidbah bad ban ailad ia ka sorkar heh paid na Ri thor ba kan nion katba ka sngewbit.

Ha ka jingsynshar jong ka sorkar BJP ha Delhi, ngi iohi, ba ia ka khajna kaba la ju lum da ki jylla, ha ki phew phew snem ba ladep, la kurup noh da ka sorkar India, lyngba ka GST bad ka sa leh katba mon, ha kaba ka shu bat kai lane ka siew bai shun sha ki jylla.

Ngi kren kob sarong sha u bieit u anna, da kaba ong, ba ngi long trai ia ka khyndew ka shyiap lane ia ki jaka ki puta; hynrei mynta ngi iohi, ba ia ka tih dewiong, la knieh noh da ka sorkar India, ia ka tih mawshun, la knieh noh da ka sorkar India bad wat ia ka tih maw bad tih shyiap, kan sa hap lang ha katei kajuh ka jingthombor jong ka sorkar India.

Mynta lada kwah leit doktor, donkam ban ialeh ia ka eksamin NEET, ban leit engineer, donkam ia ka JEET bad ban leit kolej, ne University, hab ialeh ia ka CUET.
Ki jingjia, ki long kiba sngewkhia shibun, namar ba uba la pass Class 12, lane degree, un hap ialeh eksamin biang, lada u kwah ban leit Kolej lane University bad kumjuh ia uba la pass bha ha ka Science, Commerce ruh un hap ban ialeh eksamin biang ia ka NEET/JEET/CUET, na ka bynta ban bteng sha ki kyrdan kiba kham heh.

Namar ba ka Meghalaya, kam don eiei, kumta ka hap ban shu pyndem toin ialade ha ka sorkar India, ha kaba tang ka University lajong ruh kam don, kumta ka hap shaniah ha ka NEHU, kaba dei ka University jong ka sorkar India, ka Medical kolej ruh kam don, kumta ka hap shaniah ha ki kolej jong ka sorkar India bad kumta ter ter.
Ka India, ka don ha kata ka kyrdan, kaba ki ong federal democracy, ha kaba ki jylla, ki don la ka jong ka bor bad ka sorkar India, ka don ruh ia khyndiat tylli ki bor jongka; hynrei ha kine ki sngi, ngi iohi, ba ki sorkar jylla, ki la shah knieh lut ia ki bor jongki bad naduh ka khyndew ka shyiap, ka la kurup lut ka sorkar India, ka kamai kajih bad ka pule puthi.

Kane ka sorkar BJP, ka la nang kdiah ia ki bor jong ki jylla, lada dei sha Jammu Kashmir, sha Manipur bad sha kiwei de ki bynta jong ka thain shatei lam mihngi bad ia mynta, ka iakynduh mawsiang bad ki jylla ba shathie jong ka India, namar ba ki ju shim, ba ka jingiadei jongki bad ki jylla ba shatei, ka long kumba iapher kawei ka ri, ia kawei pat.