Ki MDC jong ka Khasi Hills Autonomous District Council bad ka Jaintia Hills Autonomous District Council, ki la ioh por tam, da hynriew bnai haduh mynta; hynrei haba shu peit, la imat, kumba kam kut tang katta bad kine kin dei ki MDC, kiba donbok tam jong kane ka phew snem, namar ba kin ioh sa shisien ia ka jing pynjlan por kaba hynriew bnai (lada kam tam na kata) bad kumta kine ki 29ngut, kim dei shuh ki MDC san snem, hynrei ki dei noh ki MDC hynriew snem bad ki nongjied ngim tip, la ki donbok ne ki sniewbok, namar ba ha u snem 2019, ki jied MDC san snem, katba katei ka san snem, kam kut shuh haduh katta ruh.
Hynrei haba shu peit ia ka jingiaid lynti jongki, haduh ha kine ki sngi, la imat, kumba ki long kum u sohniamtra, katba u dang ih bha, u nang thiang ngai ngai, lane kum u sohmynken, katba u nang ih bha, u nang sat salaw bad kum u dieng bah, katba u nang heh, u nang skhem ka tynrai bah jongu bad kine ki 30ngut ruh (lem bad u dkhot shu sieh), la iohi ba haba ki ioh ia kane ka extra time, ki leh shisha, kum ki player jong ka European Cup, ha kaba kim salia satia ia ka jinglut tam ka por ialehkai, hynrei ki nion tyngeh bad ka mon bad ka diang, na ka bynta ki raieh raidam jong ka Council.
Khyndiat sngi, ki la ia thalain bha, halor ka ai jait kmie bad katei ka dei ka mat kaba da dei than haduh katta katta bad nangta ki poi sa sha Delhi, ban lum ban lang ia ki para MDC jong ka thain shatei lam mihngi bad ki ap hi khui, haduh ban da iakynduh ia U Amit Shah, ban iakren ia jingpynkylla ia ka Sixth Schedule bad katei ruh ka dei ka mat, kaba sngewieid bad ka shu thiang hi ngai bad haba ka long kumta, ka dei shisha, ba kin ioh khambun ia ka extra time, ba kin syllad kat ia ki jingthut ba har rukom.
Kine ki MDC, wat la ki la kut, ia ka por treikam jongki, hynrei kim sngew wit ne sngew lehrain satia ban leit ban wan sha Delhi, ban pynlut ia ka pisa jong u paidbah na ka pla jong ka KHADC bad kam poi shuh ka jingpyrkhat ha ki ruh, la U Amit Shah, u peit ieid ne u peit dom, namar ba ki shu bam tam ia ka tulop jongki, da shisnem eiei; hynrei ki don beit ia ka thong, ba kin lur shakhmat, halor ki mat kiba ki iohi, ba ki dei kiba ktah ia ka jaitbynriew bad kumta kine, da ka jingiasylla bad ka sorkar jylla, ki la pharia shwa ia ki Constituency bad nangta ki sa pynmih ia ka jakri jakra na katei ka kam bad kumta kan shu iaid stet ka por, ha kaba ka 24 kan leit sha ka 25 bad niuma, ba ka 25 kan leit sha ka 26 bad ter ter.
Mynta ki don ar tylli ki kam kiba kongsan duh ha khmat jong ka Khasi bad District Council bad kawei ka dei ka jingphiah Constituency, ka ban dang shimpor bha bad nangta sa ka jingpynkylla ia ka Sixth Schedule, ka bym lah antad lypa, la kan shimpor sa shibnai, kumba la ong U Amit Shah ne ioh lehse kan shimpor sa san snem bad haba ka long kumta, ki MDC ba don burom, kin hap pynkhreh lypa ialade, ba na ka jinglong MDC kaba 5 snem, ki lah ban poi sha ka 6 snem, lane shaduh ka shiphew snem ruh.
Katei ka jingleh kam lei lei, haba la ia beit bad ka sorkar jylla, namar ba kane ka pyni shai ba kane kam dei shuh ka jingsynshar paidbah lane ka jingsynshar san snem, hynrei ka dei ka mon lahduh jong ka politics bad ngim tip shuh, la ka elekshon MDC, kan long sa hynriew bnai lane sa shisnem bad tam shuh nangta, hynrei ka shu don ka jingkylli, la kine ki MDC, kiba mynta, kin leit ai da kaei ka jubab sha u paidlang nongjied ia ki, haba na ka jinglong MDC kaba 5snem, ki poi mynta sha ka MDC ba 6snem lane ba 7snem.
Donbok ba kin ong, ba ki dei ban ialehkai extra time, namar ba ki ishu ba ki iakhun ha kane ka sien, ki dei ki bym lah satia ban pyndap ha ka normal time, kaba 5 snem bad lada ka long kumta, kine ki lok, kim donkam shuh ban dang leit kanbas, hynrei la dei ban pynap lypa ia ki syntiew ban pyndeng ia ki, namar ba ki don ia ka dohnud ieid jaitbynriew kaba palat liam na kiwei pat.
Phi don ban ong eiei?