Kat ka NPP ruh kam don kyrtong pleng, ban ialeh elekshon MP

Ka NPP, ka la dep pynbna, ia ki kyrtong jongka, na bynta ka elekshon Lok Sabbha 2024 bad ka rai jong katei ka parti, na bynta ka Tura Seat, kam long kaba bakla, namar ka dei ka MP, kaba dang shu bat mynta bad ka dei ruh, ka trai party bad kumta, ka dei ban ioh ia ka lad ban iakhun biang ha kane ka sien ruh; hynrei haba iakren ia ka Shillong Seat, ka pynlyngngoh, ba kumno katei ka parti, ka leit jied ia ka kong Ampareen Lyngdoh, kaba la dei lypa ka MLA jong ka East Shillong bad kaba dei ruh ka myntri jong ka sorkar jylla.

Ha ki khyndiat taiew ba ladep, la pyni, ba ki don bun bah, kiba kwah ban iakhun ia katei ka elekshon, lada dei U Pa’iem Laborious Manik Syiem, U Bah Himalaya Shangpliang, U Ma Dasakhiat Lamare bad ki nongialam jong katei ka parti, ki kam, ba ki don haduh 5,6 ngut ki nongkwah tiket bad haba ka long kumta, balei pat ka leit jied da ka briew, kaba la long MLA bad ka jingkylli, kaba ngi hap ban ia kylli paidbah, ka long ba kumno ka kong Ampareen, haba ka dang shu jop, dang 9bnai ruh, ka la da jlep noh ia ka jinglong MLA jongka?

Kam pher, lada ka long kumta ruh, tangba ka kong Ampareen, lada ka dei shisha ka riew ialeh, ka dei ban resain noh, na ka kam myntri jongka, namar ba kam lah ban leit sha ki jingialang bapher, kum ka myntri sorkar bad ban kanbas elekshon pat ha kajuh ka por bad kam dei tang kata, ka dei hi ruh ban resain shwa ia ka kam MLA jongka ba kan lait na ka jingshah teh bad ba kan iaid laitluid, kum ka kyrtong MP bad ai, ba ka East Shillong, kan long elekshon shiteng samoi, ba ki paidbah, kin jied da u briew uba thymmai.

Kine ki jait jingleh jong ki politician, kiba da ijli sat haduh katta katta, ha kaba ki pyrkhat beit ialade hi bad kim ju pyrkhat ia ka jingduhnong jong u paidbah ka jylla, da kine ki elekshon, kiba khah khah, namar ba lada ka kong Ampareen ka jop ia ka MP, kumta, ka la ap lypa, ka elekshon shiteng samoi ha East Shillong.
Tangba ngin da ia peit ia ka jingstad jong u paidbah, namar ba lada ka East Jaintia, kaba la ju tip, kum ka ktem jong ka jing ia bom pisa, hynrei, ka dang kyntait ia U Ma Vincent Pala, ha ka elekshon MLA ba ladep, kumta, ngin ia peit kai, sa ia ka jingstad jong ka East Shillong, kaba dei ka Constituency jong ka kong Ampareen lem bad u paidlang ka Ri Khasi Jaintia, la u kwah elekshon biang ne em sa shisien na Laitumkhrah bad niuma, kaba lah ruh ban long ba na ka Shillong Constituency, lada ka kong Ampareen, kam sngewjuh ban leit sha Delhi, lada ka shu kum thohshun kumno re kumno.

Ka shong ha ka rai u paidbah, la ki kwah ban jied MP, da kiba dang laitluid, ban nym ia bunkam ki elekshon, ne ki kwah, da kiba la long MLA/MDC lypa.