Kamai pisa ki riew donsap na ka youtube

Ha ka jing wan ka rakhe Khristmas bad snem thymmai, ka mynsiem jong uba bun balang, ka beh da ka jingsngewbha suda bad kawei na ki bynta jong kata, ka dei ki jingrwai, jingtem, jingshad bad kumta ter ter.

Hynrei ha kane ka sien, ngin iakren noh ia ka spah bah, kaba khlem rngad, kaba la theh da ka you tube channel ia ki samla don sap jong ka ri Khasi Jaintia jongngi (khlem iakren ia ka pyrthei).

Ki don ki nongshna phlim, ki nongthaw jingrwai, kiba ju iathuh khyllew, ba ki don ki nongpeit, lane ki nongsngap kiba da ki million ngut lane kiba long kumba 10 lak tam bad don sa kiba bun kiba iathuh ba ki ju ioh kamai kaba long T.10, T.20 hajar bad don kiba ioh haduh T.50 lane T.60 hajar bad haduh T.1lak na ka youtube channel, da kaba ki buh ia ki jingrwai lane ki jing ialehkai bad ki jing ialeh biria, kiba ki briew ki bang bha ban peit kai.

Ym tang ka you tube channel, hynrei ki riew khraw ka pyrthei lane ki celebrity, ki ju kamai da ki million na ka instagram, lada ki buh tang kawei ka dur, ha katei ka peij jongki.
Ngim iakren ia katei ka mat, hynrei ngi iakren ia ka jingsbun bad ka jingtheh spah jong ka google bad ka youtube channel ia ki riew don sap ha ka jylla, ha kaba ka skhim kaba shi hajar, ar hajar tyngka lane da ki bun phew hajar bad da ki lak, ka shu theh man la u bnai; iaki riew don sap bad ym don sorkar shuh, kaba ai bad ka nam, ka burom bad ka jingieid jong u paidlang ka Ri bad sa ka skhim kaba hok bad kaba ym donkam ban leit khrong ne leit mane dem ia kiwei.

Ha kane ka juk, ka la dei namarkata ia ki nongrwai kiba pawnam, ki nong ialehkai kiba tbit ba kin shim ia la ka mobile lane ka camera bad ban sei ia la ka sap rwai, ka sap ialehkai bad ba kin sangeh noh, ka leit khrong na ki MLA/MDC na ki tnat sorkar, namar ka pisa, ka don mynta ha ki mobile jongphi.
Kaei kaba ka sorkar jylla, ka dei ban leh ia mynta, ka long ban plie noh ia ka studio kaba bha tam, na ka bynta ban rwai, ban ak phlim bad nangta ban plie ruh ia ka kamra heh, ban pyni ia kitei ki phlim, ba la shna da ki samla trai shnong bad tang kitei ka la biang, ba ngin pynmih ia ki heh kamai bad ki heh spah na ki sap jongki hi.