Ka UDP, ka parti Khasi ne parti Garo?

Ha ka por ilekshon, ki ju mih ki jingkren, kiba har rukom na ki riew sain pyrthei bad bunsien, ki ju don ruh kiba la kum pyllait bakla, ha ka jing iakren shongshit bad ia phalup ban pynksan ialade bad ha kane ka kynti ruh, ka mih ka mat jingiakren halor ka jinglong jingman lane ka dur ka dar jong ka seng United Democratic Party (UDP) bad ha ka jingkren jong U bah TW Chyne, CEM KHADC, ula pynshai, da kaba ong ba ka jingong ba ka UDP, ka dei ka parti Khasi, ka dei kaba bakla.

Kane kam dei ka sien kaba nyngkong, hynrei, ia ka NCP kaba la ialam da U PA Sangma, kham mynshwa bad nangta sa ka NPP, kaba ialam U Conrad, la ju khot sin hi borabor, da ka parti Garo bad kumjuh ia ka BJP, la ju tip, ba ka dei ka parti ki hindu, lane ka seng ban khang bam doh masi bad ia ka seng Congress ruh kham mynshwa, la ju tip ba ka dei ka seng dkhar.

Ka UDP, haduh ha kine ki sngi, ngi hap ban jer hi, da ka seng ki Khasi, namar ba kam don uwei ruh u dkhot na Garo, hynrei lada jia ba kan jop noh kumba katto katne ngut ki MDC ha kane ka kynti, kumta kan sa hap lang, ha ka kyrdan kum ka parti ki Khasi bad ki Garo, kumba long ka seng NPP mynta, namar ba la don ia shibun ki nong mihkhmat na Khasi, Jaintia bad na Garo ruh.

Hynrei ka UDP, ha kajuh ka por, ngim tip, la ki nong ialam jongka, ki sngew iahap, ban shah khot ia katei ka parti, da ka parti aiu, namar kumba ka long mynta tang ha Ri Khasi, Jaintia ruh, kim da ia don thikna bad ka nuksa kaba shai, ka long ba ha ka nongbah Shillong, ym don satia, uwei ruh U MLA, uba dei na katei ka seng bad ha ka jing shisha, ki nongialam ka seng UDP, ki dei ban sngewthuh bad sngew tyngkhuh ialade, ba ka sngew iahap ne em, lada jia ba ki shah khot kum ka parti Khasi bad ki dei ruh toi ban shim ia katei ka kabu, ba kin pynurlong noh ia ka jingkwah jong ki paralok Garo, ba kan dei ka parti Khasi ba nylla.

Haba kren kumtei, ka mut, ba lada ki sngew nud ne em, ban shim ia ka jingai jingmut ki Garo bad kata ka long ba kin ong ki MLA Khasi, ba ki donkam ia u myntri rangbah, uba dei U Khasi bad lada ki nud kumta, ka dei hok, ba kin kam ialade, kum ka parti Khasi; hynrei lada kim nud, ka pyni, ba kim iapher satia na ka PDF, HSPDP bad wat ia ka KHNAM.