Ka UDP, ka parti aiu?

Khyndiat sngi mynshwa, U CEM ka Khasi District Council, u pyrshang ban tyrwa ia ka seng UDP, sha Garo hills, da kaba ong, ba katei kam dei ka seng jong U Khasi, hynrei, ka dei ruh ka seng jong U Garo bad u wan rah ruh ia ka mat jong ka seng APHLC bad kiwei de ki seng, kiba la pynkha ia ka UDP, hynrei katei kam ia shoh eiei satia bad ka jingsngew ki Garo bad katei ka seng, ka la shah brut.

Haba kumta, ka UDP, kan dang kam ne em ialade, ba ka dei hi ka parti jong ki Garo ruh, ne ioh lehse, ka la thngad pynban ban shu kam ruma, haba ym don ba mon lane ban shu imon ia ka briew, ka bym ibang satia tang ban peit mat suh ruh.

Ka jingjah kyrteng jong ka seng sain pyrthei UDP, na Garo hills, kam dei shuh kaba dang shibit, hynrei, ka dei kaba la slem bad lah ban kynmaw, ba katei ka seng, ka dang ioh bsuh ialade, ha ka juk jong U BG Momin, U bah BB Lyngdoh; ha kaba imat, ka jingsngew seng trai ri, ka dang don sha Garo hills; hynrei lait na kitei, ka kyrteng seng trai ri, ka la jah noh jar bad la iohi, ba ki Garo, ki kham sngew shaniah, ia ka BJP, ban ia ka UDP.

Kawei ka jingeh ia ka seng UDP, ka long ba ka dei ka seng, kaba khih met, tang ha ka por elekshon bad la ju iohi shai, ba ki heh jong katei ka seng, ki ju hiar Garo, tang ha ka por elekshon bad lait nangta, ka don ka jing ia jngai kaba bak ly bak, ha kaba (imat), kumba ki nong kitkam jong katei ka seng ruh, kim don satia, kiba na Garo Hills bad kam dei tang kata, kam ju don kawei ruh ka mat, ha kaba ka seng UDP, kan pynleit jingmut, ia kaba ki paid Garo, ki sngew donkam bha bad katei ka wan rah ia ka jing nang ia jngai jong ki Garo bad katei ka seng.

Ka UDP, ka la dei ban sngap thuh bha ia ka jingkren jong u nong ialam jongka, U Ma Rymbui, ha kaba ula iaroh tyngeh ia U Mukul Sangma, kum u nongialam jong ka seng Congress bad lada ki nong ialam ka seng, ki la sngewthuh ia ka sur jong utei u rangbah, ki donkam ban wad, ia ka main rangbah, kum ka jong U Mukul Sangma, ka jong U Purno Sangma bad ka syrngiew U Narendra Modi bad ka elekshon ha Garo Hills, hih, hap ban pdiang, ba kam dei shuh ka elekshon lalot pisa, hynrei, ka dei ka elekshon burom nongialam.

Kaba kut, ka long ruh, ba ka la dei ia ka UDP, ba kan dawa ban pynrung noh ia ka ktien Khasi bad Garo ha ki skul, namar ba lada ngi pule ia ka English, hindi, Urdu bad kiwei, balei ba ngim dei ban nang ia ka ktien Garo, haba ngi don lang ha kajuh ka jylla?