U Mukul Sangma, nongialam jong ka seng TMC, ula pynbna paidbah, ba katei ka seng Trinamool Congress, kam kwah satia ban iakhun ia ka elekshon MDC 2025, ha Khasi bad Jaintia District Council bad ba u ong, ba katei ka seng, ka sngewthuh ia la ka jong ka bor.
Ka jingkren jong U Sangma, ka long kaba shat bun jingmut, namar ba ka seng TMC, ka don tang 5ngut ki MLA ha ka iing dorbar jylla bad uwei u dei na Khasi, Jaintia hills bad katei ka seng, ka don ruh ha ka liang pyrshah ha dorbar jylla, ba kynthup ia ka seng Congress, VPP.
Katei ka mat, kaba la buh da U Mukul Sangma, ka lam iahap, lada iakren ia ka jinglong jingman jong ka sain pyrthei ha ka jylla, ha kaba ka la idonkam, ba ka elekshon MDC, kan iaid hapdeng kito kiba don ha ka liang synshar ba kin iakhun pyrshah ia kiba don ha ka liang pyrshah, lane lehse kan bha shibun ba ka NPP, UDP, BJP bad HSPDP ba kin iakhun lang kum ki kyrtong synrop pyrshah ia ki kyrtong jong ka TMC, Congress, VPP kiba don ha ka liang pyrshah bad lada ka long ha katei ka dur, kan paw shai, ba ka jingiakhun kan long hapdeng ka kynhun sorkar MDA, pyrshah ia ki liang pyrshah sorkar ha dorbar jylla.
Kawei kaba kham kongsan ban iakren ka long halor ka jingklet noh jong kiba bun ki nongialam sain pyrthei, ia ka mat kaba ngi dei ban leit rah ha ka dorbar District Council bad ki don ruh kiba pynbiej bad pynshongshit, da ki skhim ai syntex, ai surok, ai lynti iaid kjat bad wat ka jingai kam ai jam ruh bad katei ka dei ka jingpynbieit ka bym lah shuh ban ia nujor lane kaba ialam bakla ia ka jinglong nongmihkhmat sha ki District Council.
Ha kane ka elekshon, ngi klet noh ia ka jingdon bynta jong ki District Council, ha kaba iadei bad ka khyndew ka shyiap, ka jaka ka puta, ka jingpynneh pynsah ia ki riti dustur bad ka jingiatreilang hapdeng ki Sirdar, ki Rangbah Shnong, ki Syiem bad ki bor hima bapher; hynrei la pynkylla ia ka elekshon sha District Council, la kumba ka long ka elekshon sha ki dorbar jylla bad ban iatheh puk puk da ki skhim sorkar sha ki MDC.
Ngim tip shuh, ia kaei kaba ki paidbah, ki sngewthuh ia ka jingiaid lynti jongki, ha kane ka elekshon kaba mynta, hynrei lada jia ba ngi iai kmen tohhoh tang ha ki skhim lynti iaid kjat bad ki jingkular ia ki tin sop iing, kumta ka don jingeh ban iakren ia ka bynta jong ki MDC.
Phi don ban ong eiei?