Ka thymmei jingstad ka la poi lut sha Garo hills

Ka jingplie ia ka University ba nyngkong eh jong ka jylla ha Balgre Damalgre, ka la pynthikna bha, ba ka thymmei jong ka jingstad ka don lut sha Garo hills bad katei ka kynthup ia ka Board of School Education (MBOSE) kaba la don ha ka nongbah Tura, naduh ka por jong ka jingioh ia ka jylla rilum bad mynta, sa ka University, kaba peit lut ia baroh ki kolej ruh ka don ha Tura bad katei ka la paw shai bha, ba ki skul bad ki kolej, ki don mynta ha ka jingpyniaid jong kitei ki ar tylli ki shlem kiba don ha Garo hills.

Ka jingdon jong kitei ki ar tylli ki shlem, kumta ka pyni shai, ba ka jylla baroh kawei ka dei ban phai khmat, ha kaba iadei bad ka pule puthi sha Garo hills, khamtam sha West bad South Garo hills.
Ban iatai ia kane ka mat, ka long kaba jylliew bha, namar ba ki skul kiba paw bad kiba ki samla pule ki iabeh thong, ki don ha Shillong bad nangta ki kolej ruh ki don hi ha kane ka nongbah bad nangta, sa ka North Eastern Hills University (NEHU) ruh ka don hi ha Shillong bad haba peit jngai ia kane ka mat, la iohi pynban, kumba ka niewkor shi katdei ka sorkar India ban ia ka sorkar lajong, namar ba ka NEHU ruh ka don ha Shillong, ka NEIGHRIMS, kaba dei ka jaka sumar kaba pawnam jong ka India ruh ka don ha Shillong bad ki ophis kiba heh duh kum ka NEEPCO, ka ICAR, ki don ha Shillong bad ban da dei ha kine ki sngi, la imat, kumba kitei ruh kin poi lut sha Garo hills.

Kawei pat kaba pyn pyrkhat ka long shuh shuh, ba kumno sa ki karkhana dewbilat lane ba ka jingtih mawshun pat ka jubor tang ha East Jaintia hills, ha kaba ki don da ki dorjon tylli ki karkhana dewbilat ha katei ka thain bad ba kitei ki jait karkhana, kim ioh lad satia ban rung sha Garo hills, ha kaba wat ia kaba don ha Mawmluh ruh, la hap ban khangdam noh.

Kim dei tang kitei ki ar tylli ki mat, hynrei ngi iohi, ba ki thymmei jingstad, lada dei ka Medical College, nangta sa ka Stadium kaba la bit ban iakhun ia ki jingialehkai kiba heh jong ka India, la pynbit pynbiang mynta ha Tura bad kitei ki kdew shai, ba katei ka nongbah jong ka Garo hills, kam duna eiei shuh na kaba long ka nongbah Shillong lane lah ban ong, ba ka la nang tam toi bun shah, ha ka jingdon ki shlem kiba kongsan ia u paidlang ka jylla bad kitei ki la kdew shai, ba ka don ka jingthmu kaba kham peit jngai, ha kaba kan sa mih ka jingiakren, ba lada ka Shillong, ka dei ka nongbah, kumta ka Tura, ka la biang ban dei ka nongbah jong ka jylla.