Ka jingjia ha Manipur, ka la dei ka jingjia kaba sngewngiew sat, ha kaba kumba 60,70 ngut ki mynsiem briew, kin shu iap ei bad katei ka dei na ka daw jong ka jing iakynad iapher jaitbynriew lane kaba long hapdeng ki trai shnong lane ki tribal Kuki pyrshah ia ki jaitbynriew riewthor lane ki Meitei bad la iathuh ba ki Meitei, ki dei ki riewthor bad ki don khambun ban ia ki Kuki, kiba shong sha ki jaka lum jong katei ka jylla.
Ka jingshah pyndik jong ki Kuki, ka la iai bteng, la katto katne por, naduh ba ka wan kane ka sorkar BJP ha Manipur bad kawei na kita, ka long ka jingleit kurup noh ia ki jaka puta, ba ki thung ki tep, ka jingpynpra ia ki iingmane, ba ki mane Blei, ka jingpynduh noh ia ki khlaw kyntang bad kaba kongsan eh, ka dei halor ka rai jong ka High Court, kaba ailad ia ki Meitei, ba kin kylla long ki Scheduled Tribe bad haba shu pyrkhat paidbah, la sngew kumba katei kam dei ka kam jong ka kashari, namar ka dei ka bor jong ka sorkar India (ym tang ka sorkar Jylla ruh) bad kitei ki daw haneng, ki la pyn ingkhong ia ki trai shnong jong ka Manipur bad ki dei ruh kitei ki daw, kiba pynklang ia ka ding bah ha ka jylla.
Ka jing ia kynad kaba jubor ha Manipur, ka la pynkhuslai jingmut ia ka sorkar India bad ka la nang pynkyndit shuh shuh ia ki trai shnong lane ki tribal, kiba don ha Meghalaya, Mizoram, Nagaland lane kiwei pat ki jylla jong ka thain shatei lam mihngi; hynrei ngim tip pat, la katei ka jingjia, ka don ia kaei pat ka jingai jingmut lane ka jinghikai, ia ngi ki Khasi lane ia kiwei ki trai shnong, jong ka thain shatei lam mihngi, ba ngin wad ia ki lad ki lynti ban iada na kine ki kam thombor.
Haba shu peit ia ka Ri Khasi Jaintia, ka don ha ka jing isyier kaba khraw shi katdei, namar ba ki bar jylla, ki la rung la mih katba mon bad katei ka long, ba kam don ka ain kaba lah ban teh lakam bad lada peit na ka jingbun briew, ngi iohi, ba ki bar jylla lane ki briew kiba nabar, ki la nang kiew na ka sngi sha ka sngi.
Ki nong khaii, ki nongtrei ophis, ki nongtrei business, ki wan rung katba mon bad ki wan rah, ia la ki jong ki nongbylla, da ki hajar hajar ngut bad kane kam dei shuh, ka buit ban wad kam, hynrei ka dei ka buit ban ioh long shnong long thaw ha Ri Khasi.
Kam dei tang kata, hynrei sa ka shongkha khyllah jait ki kynthei, ka dei sa kawei pat ka jingma kaba shyrkhei sat bad kata ka long ba ki ri ia u bsein ha kamra thiah lajong bad nalorkata, u kurup lut ia baroh ki jingdon jingem jong ki kynthei Khasi bad don bun, na kitei kiba ioh tnga khyllah jait, kiba shah pynking baji bad ba ki sa kylla duk ksew khamakha ialade.
Phi don ban ong eiei?