Ka synshar ka bishar, u khun khasi khara

Ha kine ki sngi, ka don ka jing iatan tyllai hapdeng ka sorkar jylla bad ka Khasi District Council, halor ki kyndon ain, kiba la tip kum ki CPC (civil procedure code) bad ki CrPC (code of criminal procedure) bad ha kane ka khep, ka District Council, ka sngew kumba ka shu shah syngngeit tyngeh, ha ka sorkar jylla, da kaba ka nion jubor, ba ki Kashari District Council, kin hap ban bud ia kitei ki kyndon ain, kiba la ju pyntreikam ha ka Ri, hi baroh kawei.

Ngi sngewthuh ba ka jing bishar ha kitei ki Kashari ruh, ka dei hi, katba kum kitei ki kyndon ain; hynrei, ka shu don ka jing iapher, namar ba ia ka jaitbynriew Khasi, la pynhap ha ka 6th Schedule jong ka riti synshar Ri bad ki don ki bynta kiba hap ban bud ryngkhi ruh ba ka jing bishar, kan iaid lang bad ka rukom jong ki trai ri trai muluk ha Ri Khasi Jaintia.

Kawei na ki nuksa, ka long ba ha ka mukotduma para Khasi, ka ju shim bishar da ka Kashari jong ka District Council bad kata ka long ba katei ka kashari, ka kham sngewthuh, lada ka don ka jing ia kajia ha ka jaka puta, ka jing ia kajia ha ka jing ia knieh ia ka hok nongkynti lane lehse, ha ka jing iasam ia ka bhah jong ka kmie u kpa bad nangta lada ka dei ha ka jingshim ia ka jait ka khong bad wat ha ka jing iadei ia ki ain kiba ia tyngkhuh ia ka niam ka rukom, ka dustur ka riti bad kiwei.

Ngin dang ia peit ia kaei, ka ban jia shakhmat, hynrei ngi la iohi, ba ka Meghalaya High Court, ha u snem 2015, ka la kdiah ia ka bor jong ki Rangbah Shnong bad ia katei ka ain, la hap ban leit ujor sha Supreme Court bad la iohi, kumba ka Supreme Court, ka kham tip kham bha pleng bad kam dei tang katta, hynrei ngi dang shu iohi shuh ha ki khyndiat sngi ba ladep, ba ka sorkar jylla, ka la pynkhein ia ka hok jinglong trai jaka jong ki nongshong khappud, da kaba ka leit ai ei ia 18 square kilometre ka jaka sha Assam, khlem da ithuh ia ka jinglong trai jong ki Khasi, ia la ki jong ki jaka puta lane kaba ngi iohi, ba ka pynkhein ia ka kyndon kaba la teh ha ka Sixth Schedule bad mynta, ka don jingthmu ban pyn iaryngkat sa ia ka bishar ha ki jaka jong ka Sixth Schedule area, kumba long lem sha kiwei pat ki jaka jong ka Ri India.

Katba kum ka riti synshar, ngi hap kynmaw, ba ki Syiem, ki Sirdar, ki Dolloi ruh, ki don ia ki kashari jongki lane ki Village Court bad kitei lei ki dei ki kashari pyn iasuk ia ki mamla bapher bad lada kitei kin duh bor noh, kumta ki mukotduma, kin shlei mam ha ki kashari sorkar.