Ki seng shitniam Hindu, ki la nang iai bteng ia ki kam thombor jongki ha Ri Khasi, ha kine ki sngi, hynrei kane ka sorkar NPP, ka sngap mynthi bad kam nud ban ang tang shi kyntien ruh.
Haba don ka jingpyrshah ia ka skul Ram Krishna ha Mawkynrew, ka mih ka kynhun shitniam na Assam, lane ka Kutumba Suraksha Parishad (KSP) kaba kynnoh ba katei ka dei ka jing kynshoit ki balang Khristan, kam dei tang katta, la iohi, ba kine ki juh ki shitniam, ki wan ban kam trai ia ka jaka shangkai pyrthei ha Mawsynram, nangta kine ki juh ki shitniam, ki wan ban pynbor ia u paidlang Khasi, ban mane blei ia ka masi bad nangta sa uwei u shitniam, ula leit rung syndon hapoh iingmane; hynrei ia utei ruh kane ka sorkar NPP, kam nud satia ban leit thwet bad set phatok ia u.
Ka sorkar BJP ha Assam, ka la nang khniot ia u paidlang Khasi jongngi, da kaba khang ban bam doh masi, nangta da kaba khang ban pynlong ia ki jingiaseng; hynrei hangta ruh kane ka sorkar MDA, kaba la pyniaid da ka BJP, kam nud ban ang shi kyntien ruh bad kine ki jingleh khawpud jong kane ka sorkar, ki pynlong ba kin nang ioh bor kine ki shitniam ban nion ban thombor ia ka jinglong kyrpang ka jaitbynriew Khasi bad ban khanglad ia ka bam ka dih bad ka jingngeit niam jongki ruh.
Kam kut tang katta, une U MP, uba mynta bad ka kynhun jong u prah, ha shwa ka elekshon, ki nion ia ka NPP, kum ka seng kaba ia treilang bad ka BJP, hynrei mynta, ynda haba ula poi dalade sha Delhi, ngim iohi ba un kren tang shi kyntien ruh halor katei ka mat bad um shym la nud ban ang ia la ka jong ka shyntur, ha kaba iadei bad ki kam thombor ia u paidlang Khasi, uba don ha Assam, lyngba ka jingkhang bam doh masi bad ka jingshakri blei ha katei ka jylla, wat la kitei ki la pynkhein ia ki kyndon jong ka riti synshar ri.
Ki shitniam na Assam, ki don ia ka thong ban pynthut ia ka imlang sahlang ha ka jylla, ha kaba ki la byrngem haduh ban pakhang ia ki kali kiba leit ba wan, hynrei kaba diaw mynsiem, ka long ba ki ar tylli ki kynhun jong ka MDA bad jong ka VPP, kiba don ha ka sorkar jylla bad kiba don ha ka dorbar Lok Sabha, ki pyndem tdong pynban ialade ha kitei ki kam thombor.
Phi don ban ong eiei?