Ka sorkar Meghalaya Democratic Alliance (MDA), ka la pyndem hi toin ialade, ha ki pohjat jong ka sorkar BJP ha Assam bad kumta ka Assam, ka la shu nion kput katba ka sngew mon bad katba ka sngewbit ia kane ka sorkar kaba la khyrwait shabi da ka seng BJP.
Khyndiat sngi mynshwa, ka sorkar Assam, ka la kem ia u khlieh duh ka University of Science and Technology Meghalaya (USTM) bad kam dei tang katta, hynrei kaba pyn pyrkhat jylliew bha, ka dei halor ka jingkren jong U Himanta Sarma, myntri rangbah ka Assam, ha kaba ula kynnoh ba katei ka University, ka ai da ki syrnot kiba thok sha ki samla pule lane ha kawei ka kyntien, kaba ong, ba ka pyn pass jubor ia kito ki bym dei ban pass ha ki eksamin.
Ka jingtuklar jong ka Assam, ia katei ka University, ka long kaba beain, namar ba katei ka dei ka University jong ka Meghalaya bad ka dei kaba la ithuh da ka UGC jong ka sorkar India bad ka Assam, kam don bynta eiei ruh ban mushlia halor ki kam jong ka USTM, lait noh kaba ujor sha ki pulit, halor ki kam tuh kam thok jongka bad kata ruh ka dei ban long sha ki pulit jong ka Meghalaya.
Haba shu peit, la iohi ba ka Assam, ka la mushlia lut khait ia ki kam jong ka Meghalaya, ha kaba ia u pud u sam ruh, la shu sngap mynthi, hadien ba la ioh ei ia ka 19 square kilometre, nangta ia ka bam doh masi jong ki Khasi kiba shong sha Assam ruh la khang, nangta ia ka jingmane blei jong ki Khristan ruh la khang, sa ia ka krem Mawjym buin ruh ki la kam trai bad mynta ki la sdang ban kurup biang ia ki jaka kiba don sha khappud bad kine ki jingleh jong ka Assam, ki pyn pyrkhat pat, ba kumno sha u myntri rangbah ka jylla lane u myntri kam poh iing, ba ki nud ban shu khapbrib ia la ki jong ki khmat bad iai kren pat sha ki kotkhubor, ba kin sa ia pynbeit biang ia u pud u sam bad kane ka dei ka jingkren khawpud kaba la palat liam.
Ka sorkar MDA, lada ka dei kaba dang don shyieng budlum, ka la dei ban pyni bor ia ka sorkar BJP ha Assam, ha kaba ka dei ban maham, ba kam bit ban tuklar da lei lei ia ki kam poh iing ka Meghalaya bad nangta ia ka jingmlien jong u paid Khasi, Garo uba don ha Assam ne ha Meghalaya ruh kumjuh bad ba ka dei ban weng ia ka jingkhanglad ia ki Khasi, kiba bam doh masi bad kiba mane blei laitluid ha katei ka jylla bad ba ka dei ban set phatok ia kito ki kynhun shitniam, kiba leit tuklar ia ka bor jong ka dorbar shnong Mawsynram.
Kane ka jingtieng pud jong ki arngut ki nongialam ba ha khlieh jong kane ka sorkar MDA, lada dei U Conrad Sangma lane U Bah Prestone Tynsong, kan sa ailad ia ka sorkar BJP ha Assam, ba kan nang thom ia ka sih ia ka sang, ha ki khyndiat bnai ban sa wan, khamtam ha shwa jong ka elekshon MLA 2026, ban pyni ba ka seng BJP, ka dei kaba ieng na bynta ki Hindu bad kaba kwah ban pynduh jait ia ki rit paid lane ia ki Kristan jong ka thain shatei lam mihngi.
Phi don ban ong eiei?