Ka sorkar jylla, ka lapheil ia ki kharmetor

Ka jingthmu ba bha jong ka sorkar jylla, ban shimti noh ia ka jaka ha Them Iewmawlong, ka la shu pulom ei noh khamakha, namar ba ki kharmetor, ki la pyni noh da ka bor, ha ki khyndiat sngi ba ladep bad kyntait war, ban kynriah na katei ka jaka.

Ka la long ka jinglehrain ia ka sorkar jylla, khamtam ia U Bah Prestone Tynsong, uba khlieh ia ka komiti ban iakren bad ki Harijan, uba la ju kren kob sob, ha ki bun bun sien ba ladep, ba yn shi yn pynkynriah noh, ia kitei ki kharmetor na katei ka jaka; hynrei mynta ka la paw shai, ba ia u kharmetor, ym lah satia ban pynbiej da ka iing kaba san mala, ym lah ban jynrat jubor ruh ia ki, na katei ka jaka bad kumta kito ki kam phlan duman baroh shi katto, ki shu bijai ei.

Ka dei hangne ruh, ba kala shai kdar, ba ki dkhar, kim ju biej pisa; ha kaba wat ha ka por elekshon ruh, wat lada phi theh, da ka top ruh, hynrei, ki te, kin iaid beit sha ka lynti, kaba kin pynim ialade bad ia la ki khun ki ksiew.
Haba shu peit na kitei ki jingjia, ka la shu long lehnohei, ka jingiakren jong U Bah Prestone, U Bah Hamlet Dohling bad U Ma Sniawbhalang ha kine ki bun snem ba ladep bad kam dei tang kata, hynrei kaba nang paw biej shuh, ka long, ba ka sorkar jylla, ka la shu bret kai, ia ka pisa kaba 2 klur ha madan ban siew sha ka Hima Mylliem, tang ban shu ai ei ia katei ka jaka sha ki kharmetor bad kaba long ka jingpynkhein ia ka Land Transfer Act.

Ka dei hangne ruh, ba ka sorkar jylla, ka dei ban sngewthuh, ba u kharmetor, haba ula kam trai ia katei ka jaka, u rah da ka wait tukri, ia kino kino kiba mut ban pynkhih, kumba ka la jia ha u snem 2018; katba ia ki trai jaka puta, la iohi, ba kumno ka sorkar, ka leh da ka jubor justi, ha kaba ki iing kiba don harud surok, la jynrat da ki JCB bad ki puh shilum bad ki trai jaka, kiba pyneh sha Mawdiangdiang (ha ki phew snem mynshwa), ba la shu kyndang jubor ia ki bad katei ka dei ka jingleh kput ia kiba tieng pud bad kiba tlot bor.

Mynta ka jing iakren, ka la dei ban kut noh hapdeng ka sorkar jylla bad ki kharmetor bad kaba sah ka long, lada ka sorkar, ka nud ban shu jynrat naphang ha katei ka jaka, lane ba kan iai shah, ba katei ka kam, kan iaid na High Court sha Supreme Court, tangba katei te kan dang shimpor, sa kumba 50 snem antad.