Ka sorkar BJP, ka la pheil jubor justi, ia ka Manipur

Ka sorkar BJP, ka la pheil jubor justi ia ka Manipur bad kat haduh mynta, kam pat lap satia, ia ka lynti, kaba biang, ban pynbeit ia ka jing iakynad hapdeng ki Kuki bad ki Meitei bad katei ka la jan dap artad ar bnai kynthih bad katei ka jylla, kam don internet; ki paidbah, kim don jaka sah kiba biang bad kumta kitei ki nongshong shnong, ki kylla poiwir ha la ka Ri.

Haduh ha kine ki sngi, ki Manipuri, ki la iap, la palat spah ngut, bun bah sa kiba mynsaw bad ki hajar tylli ki iing shong briew, ki la jot thiaw bad sa bun bah, kiba phet rieh sha Mizoram, sha Meghalaya bad sha kiwei ki jylla jong ka thain shatei lam mihngi, katba ka sorkar jylla lem bad ka sorkar India, ka shu kylla long tang ka nongpeitkai narud bad katei ka pyni, ba kam kwah ban pynbeit ia ka jing iakynad bad dei na katei ka daw, ba kam pynhiar shuki satia ia U Biren Singh, uba kiba bun ki nongshong shnong ka Manipur, ki la ijli ia u bad kam pynbeit ruh mar mar, ia ka mukotduma ha High Court lane wat ha Supreme Court, kaba ithuh ia ki Meitei kum ki Scheduled Tribe.

Haduh ha kine ki sngi, la iohi, ba ki riew pyntriem, ki ia pyni bor bad ki shipai ka sorkar India, ha kiba bun ki jaka jong ka Manipur bad kitei lehse, ki dei kiba la ioh lute, ia ki 4hajar tam ki tiar siat, na ki ktem pulit bapher bad kine ki jingjia, kin nang pynrhem shuh shuh, ia ka ding, kaba la pur kylleng ha ki ar bnai duna.
Lada ka sorkar jylla bad ka sorkar India, kim don ia ka jingthmu ban teh lakam noh mardor ia kane ka jing iakynad; kumta, kaba ima, ka long, ba ka Manipur, kan sa kylla ri khlaw, ha kaba ki riew lui lui, kin phet rieh noh ialade bad katei ka jaka, kan sa kylla long ka madan thma, hapdeng ki shipai bad ki riew pyntriem ba bun kynhun.

Ka sorkar BJP ha Delhi, ka la iai pyni, ia ki kam thombor jongka, kumba ka la leh ia ka Jammu Kashmir bad haba shu peit pyrman, la iohi, kumba katei ka phormula, ka don jingthmu kaba sha lyndet ha Manipur ruh bad lada ka jop ha kane ka sien ha katei ka jylla, kumta, kan thom, da kaba suk ia baroh ki jylla shatei lam mihngi.

Ka sorkar India, ka dei ban pynjari noh da ka synshar President ha Manipur, namar ba ka jingjia, ka la ktah jubor ia ki mynsiem briew bad nalorkata, ba kan pynneh ia ka kyrdan ki Kuki bad ki Meitei, kumba ju long naduh mynshwa bad ba kan thung, da ki ophisar rangbah jong ka sorkar India lane na ki jylla shatei lam mihngi, ba kin sdang ia ka jing iakren iasuk bad ki kynhun bapher.