Ka sngi ai tika, ha ki mobile phone

Ka sorkar jylla, lyngba u symbud myntri rangbah, ka la pyntip, ba ka la rai ban pyntip, sha kito kiba dei ban ioh injekshon, na ka khlam covid, lyngba ki mobile phone jongki bad haba shu sngap shisien sngap, la sngew kumba ka long kaba iahap bha, namar ba katei kan pyn duna ia ka jing ia bun briew ha ki jaka injek bad kan pyllait ruh, na ka jing bunkam, ha kaba ia leit ia wan, sha ki jaka injek shong ban tip, ia la ka pali.

Hynrei, ka jing shisha, ka long, ba ka sorkar jylla, ka kwah, ban wad ia ka lad kaba suk tam bad kaba duna jinglut tam ruh bad kata ka long, da kaba shu shaniah ha ki mobile phone, wat la ka tip shai, ba katei ka jingthmu, kan nym long satia kaba trei kam.

Ka sorkar jylla, ka tip bad ka sngewthuh bha, ba ka jing hikai online ia ki khynnah skul, ha u snem ba ladep, ka dei ka rai, ka bym larkam satia, namar ba ki khynnah skul, ki la ia sa pra lut, sha ki shnong ki thaw jongki, katba ka mobile kam trei kam satia, ha kaba tang ban phone ruh kam long bad ia ka internet lei lei, kam don jingmut satia ban iakren bad kumta, ka la dei ban ioh jing hikai, bad shemphang, ba ka jing shaniah, ha ki mobile phone, ka dei tang ka buit anna suda.

Kata ka dei kawei; hynrei, hap ban sngewthuh ruh, ba ki khynnah skul, ki don da ki katto katne phew hajar antad bad kumta, lada ia ki phew hajar ruh, kam lah ban pynioh network bad internet, kumta katno tam ia ki phew lak ngut, kiba dei ban ioh ia kane ka injek, ia ka khlam covid, ba kan pynioh (i) network (ii) pynioh internet bad kaba kham kongsan duh, ka dei (iii) ban pynioh mobile ia bun bah, ki bym ioh lad, wat tang ban buh ia i mobile iba tad tam.
Kam lei lei, lehse, ka sorkar jylla, ka kham sngewthuh, ia la ka jong ka bor bad lehse, ka kwah ruh ban pyllait ialade, na ka jingshah wohnia bad ka jing shah lehrain, namar ba haduh mynta, ka don tang 42hajar tylli ki dawai injek, lane lada iakren antad, kaba mut hi, na bynta ki 40hajar ngut ki briew lane kaba long tang shi powa ka nongbah Shillong lane ha shiteng ka jaka trei kam jong kawei ka C& RD Block.

Wat la katta, ka dei ban shim khia ia kane ka kam bad kam dei ban rieh tngen, da kaba nion ia u paidbah da ka pakhang shnong, kaba bteng da ki bnai lynter taid.