Ka Secreteriat, kam dei shuh ka jaka paidbah

Ka elekshon, ka la nang hajan eh bad la nang iohi, ia ki tamasa bapher ha ki bynta bapher ka jylla; hynrei ka jing iapher, ka long ba ha ki nongkyndong, ka iaid ka jing ia sam skhim, sam pisa bad ka jing ia pynrung briew sha ki seng sain pyrthei, katba ha syndah ka Secreteriat, ka iaid da ka jing iakhih paidbah man ka sngi, halor ki ishu kiba kongsan ia ka jaidbynriew.

Ngin sa ia peit ha ka sngi thep vote, ka treikam ka ishu jaitbynriew ne kan trei kam pynban, ka ishu sam pisa bad katei kan sa paw, ha ka sngi niew vote, la kin jop elekshon da ki heh pla, ne kin jop da ki heh khlieh.
Kaba ilyngngoh, ka long ia ka jingkhanglad jong ka sorkar jylla, ia ka jing ia rung ia mih sha Secreteriat, da kaba ka pynjari ia ka section 144 Cr PC bad katei ka pyni shai, ba ka Secreteriat ha kine ki sngi, kam dei shuh, ka jaka paidbah, hynrei, ka dei ka jaka jong ki heh ki hain suda bad ban ioh rung sha katei ka jaka, ka donkam tang ia ki heh bor, kum ki nongialam sengbhalang; hynrei ym ia kiba tlot bor, kum ki nong hikai, kiba shah synreit, da ka lyer pynsatkhmat.

Mynta haba ka elekshon, ka la jan, ka la dei ia ki nongialam seng bhalang, ba kin bud ia ki nuksa jong kane ka sorkar NPP bad kata ka long, ba lada ym bit ban ia lum paidbah sha Secreteriat, kumno kan bit ban leit kanbas elekshon lane leit sam skhim sha ki shnong, haba ka la dei sa ka por ban pynbna tarik elekshon noh bad kumta, lada ka sorkar ka pynjari 144 Cr PC ha sawdong ka Secrete riat, kumta ruh, ki sengbhalang, ki dei ban pynjari da kawei pat ka Cr PC, sha ki shnong ki thaw, ba ki paidbah kim bit ban ialum briew, haba ki leit ki myntri sorkar, lane ki kyrtong ialeh MLA.

La ju iohsngew bha, ia ki jingud jingnam jong ki kynhun bapher, lada dei ki nonghikai, ki sengbhalang bad ki seng trei mon sngewbha bapher, ba kim ju iohlad ban leit iakynduh ia U Conrad Sangma, myntri rangbah ka jylla bad katei ka la dei ka jing khanglad ia u luk u lak, ba un leit iakren ia ki jingeh jong ki sha ka sorkar jylla bad kumta, lada ia kynduh ruh ym ioh bad lada leit ia lum hajan Secreteriat ruh ym lah, kumta ka pyni, ba ka jingthmu jong ka synshar paidbah ha ka jing ialam jong kane ka sorkar NPP, ka la duh jait noh syndon.