Ka roster system, ha ka bhah kam bhah jam

Ka ktien roster jong ka Meghalaya high court, ka la dei ka kyntien, kaba ia pyndonkam bha ha kine ki sngi bad ka jing iakren paidbah, ka la pynkylla ktien Khasi noh ia katei ka ktien phareng, kaba thew ha ka jing mang mar ryngkat ia ka bhah kam bhah jam ha ka jylla.

Ka sorkar jylla, kam pat pynshai paidbah satia ia ka rai jongka, halor ka roster system; hynrei, u myntri rangbah, u iathuh ba ki la dep jubab sha ka Meghalaya High Court, ia ka rai jongki, ban pyntreikam ia katei ka bhah kam bhah jam ba pura bad haba ka long kumta, ka pyni, ba ka sorkar, ka la pynthikna sha ka kashari, ba kan bud pyrkhing bha ia ka jing ia bhah kam, kaba long 40 percent ia ki Khasi, Jaintia bad 40 percent ia ki Garo bad lada shim na katei ka kyntien, ka kdew ba ka sorkar jylla, kan jied beit mar ryngkat ha ka thungkam thungjam bad (lehse) ha ka jingleit pule ha ki tnat pule, ban bei pisa da ka sorkar jylla; lane lada jia ba katei ka bhah, ka sahteng, kumta ka sorkar, kan hap ban ap, tad haduh ban da ioh pyndap, ia ka bhah jong kata ka jaitbynriew.

Ka nuksa kaba suk bha, ka long ba lada lait 10 tylli ki kam doktor, kumta, yn hap ban thung 4ngut ki Khasi Jaintia bad saw ngut ki Garo; hynrei, lada don noh tang 2ngut ki Khasi, Jaintia; kumta ia katei ka kam doktor kaba thylli, yn hap ban ap, haduh ban da mih doktor na katei ka kynhun jaitbynriew.

Kam dei tang kata, kumjuh, ha ka jingleit pule lain, lada dei ban leit pule enjiniar shiphew ngut, hynrei lada don ki samla Garo, tang ar ngut, kumta katei ka bhah, kan sah thylli noh bad ym lah ban pyndap da ki Khasi, Jaintia bad kaba kham eh, ka long, ba lada ki Garo, ki duna arngut ha u snem 2022; kumta, ha u snem 2023, kin lah ban ioh ia ka bhah jongki kaba 40 percent bad plus bad kitei kiba kim lah ban pyndap, ha u snem 2022.
Ngim tip, la katei ka ain, kan iahap ne em ha ki kam; namar ba ka jing iabeh ban leit pule doktor, ka la jubor haduh katta katta, ha kaba hap ban leit shaduh shabar ri, hynrei, ia ka bhah lajong ruh yn nym lah ban pyndap, lada duna briew na ka liang U Khasi, lane na ka liang U Garo ruh kumjuh.