Ka Ri Khasi, ka ri jong ka dud bad ka ngap

Ka Ichamati, ka la pyn khihwin ia ki bar jylla ha kine ki sngi; hynrei kaba lyngngoh, ka long ba kiba pynkhih, ki dei lyngba ki briew kiba don shabar jong ka Jylla (lem bad ka jing kynshoit jong kito kiba don ha katei ka shnong khappud), hynrei ngim shym la iohi satia ia kiwei pat ki kynhun nong shong shnong Bengalee, kiba don ha Shillong lane sha kiwei pat ki bynta jong ka Ri Khasi Jaintia, ba kin ia shim bynta lang.

Ka ri khasi, ka dei ka ri jong ka dud bad ka ngap bad kumta ki briew kiba nabar, ki wan khnang na ka bynta ban ioh dih shngiam ia ka dud bad ka ngap bad lada jia ba kam don shuh ka dud bad ka ngap, kumta yn nym don shuh mano mano ruh ban kynmaw bad ka jing shisha, ka long ba ka jingiakren ia mynta kam dei satia ia ka shong ka sah, ka suk ka shngain jong kitei ki bar jylla, hynrei ka dei beit, namar ba ka Ichamati, ka dei ka par shna pisa kaba heh bha, ha kaba ki nong khaii mawshun, ki nong khaii maw, ki nongkhaii dewiong, ki im sahuh ha katei ka kad khaii, da ka jing ia dei bad suh buit bad ki katto katne ki trai shnong ha ka kyrteng jong ka jing ialeh benami.

Mynta lyngba ka jing shah pyniap uwei u samla Sohra bad nangta, na ka jing pynjari ia ka pakhang shnong, kaba la iai bteng, la bun bun bnai, ki la bun ki bar jylla, kiba la mih noh na katei ka jaka, namar ba kim don kam shuh ban trei bad nangta, ka mih sa ka jing ia talasi ia ka jing ia khaii benami bad ka jing ia suh buit jong ki trai shnong bad kitei ki nong khaii bar jylla bad kitei ki la pynmih ia kine ki jing kren pynshit, ki bym pat ju jia ha ki phew snem ba ladep, mynba ki dang ioh ban dih shngiam ia ka dud bad ka ngap jong ka Ichamati bad ka Majai.

Namar ba kitei ki ar tylli ki shnong, ki la pyn jah burom ia ka Ri Khasi Jaintia baroh kawei bad ka la pynmih ia ka ishu jong ka jing ia ijli para briew, kumta, na ka bynta ban nym ailad ia ki kam ia pait jaitbynriew lane ia pher niam, ba kin nang saphriang, lyngba kitei ki kyrteng; ka la dei ia ka District Council bad ia ka sorkar Jylla, ba kin shimti hi noh ban synshar ia kitei ki shnong bad ba kin tih tyllong, ia kino kino ki kam beain, lada dei lyngba ki Rangbah Shnong, ki Syiem lane ki trai jaka puta bad ba ka la dei namarkata, ba ngin phai sha ki ain kiba la don lypa ha ka Jylla lane ha ki District Council.

Ban pynkut, to ngin kynmaw ia kawei ka jingrwai Khasi, kaba ong “katba dang ieid U Trai Nongthaw, ko Ri Khasi, phan nym long mraw” bad kitei ki dei ki kyntien shongsbai, kiba ngin hap ban iaid ryngkat ryngkat ha ka jinglong kawei kum ka jaitbynriew.