Ka Ri Khasi, ha ka wat pynbeit pud kaba ar

Ka Ri Khasi, kan leit ha ka wat pynbeit pud kaba ar bad ia katei ka jingthmu pynbeit pud, kaba ar, la rai, da ka jing ia kynduh jong U Conrad Sangma, myntri rangbah ka jylla bad U Himanta Sarma, myntri rangbah ka Assam, lem bad ki ophisar ha ka Sngi U Blei ba ladep, ka 21tarik Nailar 2022 bad ka shu pyn pyrkhat ia uba bun balang, ba ka jingsdang pynbeit pud, baroh arsien, ka iaid shwa da ka jing ia kynduh hi jong ki arngut ki myntri rangbah bad ha shwa jong kane ruh, ngi dei ban kynmaw, ba kitei ki la ia kynduh ia bam ja miet, ha ka 28tarik Jylliew 2021, ha kaba tang u Sarma, U Conrad bad ki tnga jongki, ki ia shong lang bad hadien kata, ka sa sdang ka jing iakren pynbeit pud ki ar jylla.

Ha shwa jong katei ka jing iakren pynbeit pud, u Sangma, ula kren ia ka jingshisha, da kaba u ong, ba ngim lah ban khmih lynti eh, ia ki jaka kiba la don sha Assam, ba ngin lah ban wan rah biang sha Meghalaya bad katei ka dei ka jingphla kaba hok bad kaba khuid jong u myntri rangbah, namar ba tang ia ka map kaba la dro ha u snem 2011 bad kaba dang sahkut, ha ka jing iakren ruh, um lah ban pynkohnguh ia ka Assam (ba kin ia peit biang); kumta katno tam, un leit nud ban saham ia ka jaka kaba 500 square miles, kaba la kurup da ka Assam, naduh u snem 1951 bad ka dei na kata ka daw, ba ia ka Karbi Anglong District Council, u pynrung lang ha ka komiti, katba ia ka Khasi bad Jaintia District Council, um shym la kynthup lang satia.

Hynrei, haba iakren ia kane pat, ngi hap ruh ban shai, ba lada ia ka ain MRSSA, kaba la thaw da U Mukul Sangma, ha u snem 2016, ula pynduh pyndam noh, da kaba ong, ba ka dei ka ain kaba khlem shyieng budlum, kumno pat, ba ia ka jingkam pud kaba la leh hi da U Mukul Sangma, ba um nud satia ban saham eiei ruh em bad katei ka pyni, ba ia kaba phi sngewbiang, phi nang pynskhem, ia kaba phi sngew wit phi pynjot pynduh noh syndon.

Ki jingkren jong U Conrad, ki la shai bha; wat la ka jingleit jurip kam pat sdang, ba kane ka wat, kaba ar ruh, kam dei satia ka jingpynbeit pud, hynrei, kan dei tang ka jingleit sieh mawpud bad ki nongialam shnong ne ki riew sain pyrthei, ki hap ban pynkhreh lypa ialade, ba ka jing ia kam jaka, kan nym jia satia, hynrei, kan dei tang ban pynskhem ia kito kiba ka Assam, ka la nang tur ha ki phew phew snem ba ladep.