Na ka bynta ki nongthep vote jong ka Shillong bad ka Tura Parliamentary Constituency, kan dei ka jingap kaba jlan bha, kaba long haduh shibnai shiteng; kat haduh, ba kin da tip ia ka liem ka lum jong ki kyrtong jongki, namar ba ki thep vote, nyngkong eh, kaba dei ha ka 19tarik Iaiong, hynrei ia ka result kin ia ioh lang bad kiwei, kaba dei haduh ka 4tarik Jylliew 2024.
Na kiba buh jingkynmaw, la iathuh, ba kane ka elekshon, ka dei kaba slem tam ban pyndep, namar ba ka don haduh hynniew sien thep vote bad kan kut haduh ka 1tarik Jylliew 2024.
Ka jingthep vote, ka dei ka bynta kaba kongsan tam jong u nongshong shnong, hynrei lada ia ka jingai result pat ka shimpor haduh ar bnai duna, katei ka pyni, ba ka la kham slem noh ban ia kaba korek ia ki kot eksamin jong ki samla ialeh matrik, namar ba ki don da ki phew tylli ki sobjek bad ha ka jingshisha, kam dei ban long kumta, namar ba ia ka vote, kaba sah ka long tang ban khein la ka jong ka jong, ia kiba kyrshan ia ki kyrtong bapher bad kane ka jingbuhteng, haduh ar bnai duna, ka pynduh noh ruh ia ka jingbang jong ki kyrtong bad wat ia kiba thep vote hi ruh kumjuh.
Ki don shibun ki Ri, kiba pyn donkam, da ki kot thep vote, lada dei ka Bangladesh lane ka Pakistan (kiba don marjan bad ngi), hynrei kitei, ki la da niew vote noh mar ia kut ki kynta thep vote bad kim ju buh kai satia, da ki bnai, kumba ngi leh ha India.
Kam dei tang kata, hynrei, ka don sa kawei pat ka jingma kaba khraw, ha kaba iadei bad kine ki mashin bad ia kata, ngi la iohi, ha ki khyndiat sngi ba ladep, ba ka mashin ka la bam um, ha Wah Brahmaputra, namar ba ka ngam jyllop ka lieng bad kane ka jingma, ka dei ka bym lah lypa ban pynthikna, namar ba ka ding ka lah ban bam duh, u jumai, u lah ban pyntwa bad ka eriong ne ka jingshlei um bad kitei ki dei ki daw kiba shyrkhei shibun, nalor kato kaba ki ju ong ba ka parti kaba don ha ka bor, ka lah ban pynkylla ia kitei ki mashin, katba ka sngew mon bad katei lei, ka dei kaba sngew shyrkhei sat.
Ki liang pyrshah, ki ther jubor ia ka sorkar BJP, halor kane ka jing pynjlan kai ia ki sngi thep vote, da kaba kynnoh ba ki kwah ban ailad ia ki nongialam jong katei ka seng, ba kin leit shang kylleng ka India bad pynlut kai ia ka pisa paidbah.
Ngim tip, la ka jingpynjlan haduh 7 sien, ka don jingmut ne em ban pynmyntoi iano iano; namar ba kaba kum kane ka elekshon, la dep leh lypa ha u snem 2021 ha ka elekshon dorbar jylla ha West Bengal; hynrei katei kam don jingmyntoi eiei ruh em ia ka seng BJP bad ka nang plie lad pynban ia ka Trinamool Congress, ba kan nang jop donburom, sa shisien ha katei ka jylla.
Ka sorkar BJP, ka kam ba ka India mynta ka don ha ka jingshongsuk bad ka jingshong shngain bad haba ka long kumta, ka la dei ban plie lad ba ka jingthep vote, kan long ha ka shisngi bad mar ia dep vote, mar ia niew noh.
Phi don ban ong eiei?