Ka NRC ha Assam, ka la pheil

Ka elekshon, ka la nang jan eh ha Assam bad kumta, ka la dei ka por ia ka sorkar BJP, ba kan sei noh ia ka snieh ar sap jongka, ha kaba iadei bad ka National Regis tration Certificate (NRC) bad katei ka mat, kam shym wan satia, na ki nongialam AASU, na ka Congress lane na kiwei pat ki seng, hynrei U Himanta Biswa Sarma, myntri ka sorkar BJP ha Assam, uba khlain bor hi kum U Sarbananda Sonowal, myntri rangbah (katei ka Jylla), ula pdiang ha ki khyndiat sngi ba ladep, ba ka NRC ha Assam ka bakla.

Kat katei ka jingleh niewbein, ka jing pyndik ia ka bor, ia ka por bad khamtam ia ka jingrit mynsiem jong kitei ki briew, ha ki ar snem tam ba ladep bad kane ka sorkar BJP, ka la kyndat ia ki 19lak ngut antad, ba kim dei shuh ki nong India bad kitei ki dei kiba ju ioh ia ka hok thep vote baroh shi jingim, hynrei ki MLA, ki MP jongki, ki la kylla long beain lut khoit, namar ba la jied ia ki, da ki mynder ri.

Katei ka jingkren jong u myntri ka sorkar Assam, ha kine ki sngi, ka thew beit beit, ba ka elekshon, kan poi noh artad bad kumta ka jingduh ia ki 19 lak vote, lada shu ia khein antad malu mala kan poi sha ka 19 ngut tam ki MLA, ha ka elekshon 2021 bad kam dei tang kata, la ioh sngew bha, ia ka jingkren bynniaw ba kiba shah mait ha ka NRC, kim dei tang ki Muslim, hynrei ki dei ki hindu ruh (kiba ka seng BJP kam shym mut satia) bad ki don bun ki jaitbynriew Nepali ruh, kiba kren bitar, ba ki la shah weng sharud ha ka NRC.

Ka jingthmu kaba kongsan jong ka seng BJP, ka long ban weng ia kitei ki bym don kyrteng ha ka NRC bad ban thep da kiwei, lyngba ka ain CAB (CAA), hynrei, lada ym lah ban beh noh ia kitei ki 19 lak ngut, kumta kan long kaba eh ban iai pynrung ia ki lak ngut kiwei pat, ha katei ka Jylla bad lada ka long kumta, ka sorkar India, kan hap wad jaka thymmai shawei pat, lane kan hap buhteng ia la ka jong ka thong jongka, kaba ka thmu ban pyn urlong ha shwa ka 2024.

Ka la mih bun ka jingkren, ba kitei ki 19lak ngut, ki dei ki khar Bangladesh, hynrei ka Bangladesh, kan nym treh ban shimti ia kitei ki poiwir sha ka ri jongki bad kam dei tang katta, hynrei kan nym long shuh kaba suk ruh ban set phatok ia kitei ki 19 lak ngut ha Assam, namar ba ki ri ka pyrthei lem bad ki human rights group, kin peit pyrman bha halor kane ka mat.