Ka NPP, kam don kyrteng myntri rangbah

Ka Nationalist Peoples Party (NPP), kam shym la don satia ia u kyrtong myntri rangbah, ha kane ka kynti bad katei ka long, kumba la kren da U bah Prestone Tynsong, nongialam jong ka seng bad katei ka mat, kam don jingmut shuh hi ruh ban iakren, namar ba lada ka NPP, ka ioh biang ban thaw sorkar, kumta U Conrad Sangma, un nym risain satia, na ka shuki myntri rangbah bad un sa shu bteng biang ia katei ka kam jongu, hadien ka sngi niew vote, ha ka 2tarik Lber 2023.

Katei ka mat, kam iahap shuh hi ruh ban dang iakren, namar ba wat ha u snem 2018, ba la dep pynbna lypa ia ka kyrteng jong u myntri rangbah, hynrei U Conrad Sangma, u dang shet kylla bad nud ban risain ia ka kam MP jongu, da kaba u leit bam smai, kum u myntri rangbah ka jylla bad ka dei ruh ha ka sien nyngkong ha ka histori jong ka Meghalaya, ba u briew, u bym long MLA, lane u bym dei satia u dkhot jong ka Legislature Party, un shah jied kum u nongialam jong ki MLA bad katei ka dei ka jingjia, kaba thamula tam ha ka histori jong ka jylla.

Kam dei tang kata, la kynmaw, ba kine ki juh ki heh jong ka NPP, ba ki la kob sob tasam, ha u 2018, ba kin thaw sorkar hadien ka elekshon; hynrei, ynda dei ka sngi niew vote, ki leit shong thad sngi pynban ialade ha phyllaw jong U Dr Donkupar Roy, nong ialam jong ka seng UDP, ban khroh ban kjor, ba un ai jingkyrshan ia ka seng NPP, kaba jop tang 19ngut ki MLA.
Ka jingshisha, ka long ba ha katei ka sien, ka NPP, ka la dei ban ailad shwa ia U Mukul Sangma, uba dei u nongialam jong ka seng Congress, uba jop 21ngut ki MLA, ba un thaw sorkar bad ka NPP, ka la dei ban shong ha ka liang pyrshah; hynrei ha ka rhah shuki, leit khroh sa ia ki tit bapher, kum ka PDF, HSPDP bad wat ia ki MLA shimet, tang ban pyndap ia ka jingkhein ba 31ngut.

Ngin dang ia peit, ia kaei ka ban jia ha ka 2tarik Lber 2023 bad la ka NPP, kaba kam ia 34ngut ki MLA, ba kan jop; kan lah ne em ban pynurlong shisha, hynrei tang kawei kaba ngim dei ban klet bad kata ka long, ba ha u snem 2018, ka shuki Chief Minister, la pynap ia ka Agatha bad U Conrad Sangma bad ha kaba kut, u tare hi noh U Conrad bad u phah biang ia ka Agatha sha Lok Sabbha.