Ka nongrim, ba synjor ki seng trai ri

Ka la mih sa kawei ka seng sain pyrthei ba thymmai bad kata, ka dei kaba la ialam da U MLA barim, U bah Ardent Basaiawmoit, u briew, uba la don ha shibun ki seng sain pyrthei bad wat ki seng teh song jait bynriew.

Utei u rangbah nongialam, ula sei mynta da ka Voice of People Party (VPP) bad ka jingpoi jongu, sha katei ka jingthaw seng thymmai, ka kdew ba ka jingthmu, kam lah ban urlong, lada dei ha ka UDP, HSPDP bad wat haba ula sdang ban leh jan ia ka seng Congress, khyndiat snem mynshwa.

Hynrei, katei kam dei eh ka phang iatai, namar ba ka jinglong jingman ki seng trai ri, ka la dei hi ban kren shai, ba ka dei beit tang ki seng pyn pharia vote bad ki seng jong ki Khasi (ha kaba kham bun, ki kham ioh lad ha Khasi Hills, ym dei satia wat ha Jaintia hills) bad katei ka mih, namar ba kat kiba pyrshang ban tur sha Garo hills, ki shu liem lyndang hi plain.

Wat ka UDP, kaba kam ialade, ba ka dei kata ka seng nylla jong ki seng trai ri, hynrei, ha kine ki sngi, ka la shu long noh, tang ka seng ki Khasi, Jaintia bad kam shym la ioh lad satia ban iuh kjat ha Garo hills bad ka dei na kane kein ka daw, kumba la ong haneng, ba ki dei ki seng pynpait vote, ki seng pyn pharia jait bynriew, namar ba kim lah satia ban lum ia ki vote na Garo hills.

Mynta, ngi don ia ka UDP, HSPDP, PDF, KHNAM (mih sa ka VPP) bad kine ki dei kiba kam ialade, ba ki dei ki seng trai ri nylla; hynrei kitei ki kyrteng baroh, kim don jingkhein satia sha Garo hills bad katei ka pyni, ba U Garo, um shaniah satia ia kitei ki seng bad u sngew skhem hi ialade ha ki seng heh jong ka India, kum ka BJP, NPP, Congress bad kiwei.
Ka UDP, lada ka kam, ba ka dei ka seng trai ri nylla, ka la dei ban iaid shakhmat dalade hi bad ba kan mad ia ka rem ne jop, lada ka long ha kano kano ka dur; namar wat tang bad ka HSPDP ruh kam iahap jingmut satia, namar ba ka HSPDP, ka buh ia ka thong jongka, ban ioh ia ka Khasi Jaintia State, kaba ka UDP, kam don satia kum katei ka mat.
Kane ka jing iakren ban ia syllok para seng trai ri, ka long ka jing pynlut por suda bad ka bym don jingmut eiei ruh em, namar ba ki nong ialam seng trai ri, ki la pynduh ei, ia ka sotti juk jong ki por ka APHLC, PDIC kiba dei ki seng jong ka juk ialeh hill state.