Ka niam, ka dei ka jingngeit shimet jong u briew bad haba uta u shimet, u mane ia uno uno u Blei, uba u sngewmon, kumta katei ka dei ka rai jongu hi; hynrei ha kine ki sngi, ngi iohi ia ki buit bapher, kiba pynshit ia ki briew, halor ka nongrim jong ka niam bad kine ki kam pynshit, kim shym la pynmyntoi eiei ruh em ia kito kiba ngeit ha kano kano ka niam, hynrei, ki ioh nong bad ioh myntoi pynban, da kito kiba ai ding narud narud.
Ka jingiakren hangne, ka long la ka niam, ka lah ne em ban wan rah ia ka jinglong kawei jong kano kano ka kynhun bad ia kane ngi dei ban shim nuksa shwa ia kaei kaba dang shu jia ha Bangladesh, kaba dei ka ri jong ki Muslim lane kaba don tang katei ka niam, kaba khlain bor ha baroh kawei ka ri.
Ka nuksa jong ka Bangladesh, ka paw shai, ba ka niam, kam lah ban wan rah ia ka jing ia ieid ne ia tylli jong kano kano ka kynhun jaitbyn riew, namar ba ka Bangladesh, ka la dei lypa ka ri kaba ka kyndon jong ka niam Muslim, ka khlain bor bha; hynrei haba ka synjor ka synshar khadar bad ka jubor ka tuh bad ka jingbamsap, kumta u paidlang jong ka Ri, um lah ban kyrshan dohiap, tang halor ka jingsngewniam.
Wan sa ka Pakistan, katei ruh ka ri Muslim, hynrei la iohi, ba ka sain pyrthei jongki, ka dap da ka jing ia pynhiar kput iwei ia iwei bad nangta sa ka Afghanistan, ha kaba hangtei lei, ki thombor sa ki ehrang ban klun ia ka sain pyrthei bad ioh thaw sorkar bad kata ruh ba ki shim, ba ka dei halor ka nongrim jong ka niam hi, nangta ka Iraq, Syria bad shibun kiwei pat.
Haba shu peit kyllum, ngi iohi, ba ki ri sepngi, lada dei ka United Kingdom, ka United States of America, ka France, Germany, Italy bad sa ki phew tylli kiwei pat, ha kaba kitei kim ju pyn iakhleh ia ka niam bad ka synshar khadar bad la iohi, ba ka sain pyrthei, ka iaid la ka jong, katba ka jingmane blei, ka dei la ka jong ka bynta bad ka dei lehse, katei ka jingbym ia khleh jong ka niam bad ka sain pyrthei, ba ki ri sepngi haduh mynta, kim tieng ia ki jaitbynriew Muslim, kiba la sdang ban buhai shnong kum ha UK, US, Germany, France, Sweden bad sa shibun bah kiwei de ki ri sepngi.
Kam dei tang kata, ngi iohi ruh, ba kitei ki poiwir Muslim, ki la sdang ban leh trai khlieh, wat la ki dei tang ki sohshnong ha kitei ki ri sepngi bad wat la katta, la iohi, ba kitei ki ri Kristan, kiba khlain bor jong ka pyrthei, kim shym la sngew wit eiei ruh em, na kitei ki jingleh hangamei jong kine ki poiwir, namar ba ki don kata ka jingkylluid mynsiem ban peit ia ki para briew; hynrei kaba i syier ka long, ba ynda ki la khih kitei ki ri kiba riewspah bad ki ri jong ki stad ki nang ba kin sa pyni bor tang tiak, kumta kitei ki nongthombor, ki la duh jait syndon.
Ha ki 10 snem ba ladep, ka India, ka la sdang iaid, da katei ka lynti jong ka jingsynshar, ha ka nongrim jong ka niam; hynrei ngi tip bha, ba ka jingsngew jaitbynriew, ka dei kaba wan ha khmat duh, ha kaba ki South India, ki lah ban dei ki hindu, hynrei kim pdiang satia ia ki para niam jongki, kiba ki khein, ba ki dei kiba duk tasam bad kiba tlot ka ioh ka kot bad ka jingnang jingstad bad kam dei tang kata, wat ki nong India ba shatei, ki don kajuh ka jingsngew niam, hynrei ki kham ngeit ha ki kam ia pyni bor bad ki kam leh niewbein ia kiwei pat bad ki ju shaniah bha, ba ka dei lyngba jong ka politics, ba kin lah ban nang kham long riewniam ne kham long riewblei.
Phi don ban ong eiei?