Ka niam, ka kam pynjot pyrthei

Sngewsih ban iohi, ha kine ki sngi, ba ka niam, kaba dei ban ia ieid para briew, hynrei, ka kylla long pynban ka nong pynjot pynpra ia ki jaitbynriew bapher bad hapdeng kawei ka niam ia kawei pat.

Hap iakren ia kane, hadien ka jingshah dung U Salman Rushdie, ha ki khyndiat sngi ba ladep, tang namar ka kot jongu, kaba u pynmong ia ka jingsngew jong ki riew niam Muslim.
Kam dei tang kata, ki la don bun bah ki jingjia, kiba ju wan rah ia ka jing ia iap ia duh, tang na ka daw jong ka jing ia shun niam bad katei, la imat, kumba kan kylla long ka thma bah pynban, ha ki sngi, ki ban sa wan, tang na katei ka daw.

Ka jingjot jong ka ishu jong ka niam, ha kine ki sngi, ka dei ba ki seng sain pyrthei, ki ia shongshit baroh baroh ban ialeh riew niam, ha kaba la iohi, ba u thylliej pait pnat jongki, um ja sangeh ban kren halor ka ishu niam bad haba ki leit sha kano kano ka jing ialang paidbah ne ki prokram ba donkam, ki leit wad shwa ia ka jaka lehniam bad wat ia ki iing sorkar ruh, haba ki plie, ki pynlong niam shwa bad kine ki jingjia, ki la pynjot ia ka nongrim jong ka synshar paidbah, khamtam ha ki ri ba ieng nongrim, halor ka synshar paidbah, kum ha India.

Ka jing iadei bad ka kam niam jong u briew, ka la dei ban long ha ka jingsngewthuh shimet jongu hi bad kam long ruh kaba bha ban leh shlur, ia la ka jong ka jingngeit niam, ha ka jaka, kaba phi iadon kham bun, namar ba phin nym lah ban im tang shi jaka lane kumba phim iaid phim ieng ne ia kynduh kam ia shibun kiwei pat kiba don da kiwei ki jingngeit niam, lane ha kawei ka kyntien ba u hindu, um lah ban lait na ka jing ia kynduh ia u Khristan lane ia u Muslim lane ba ka petrol, diesel jong ka Iran, kam bit satia, ban pyndon kam ia ki hindu ha India.

Kumba la iakren, ka dei namarkata, ba ka ishu niam, kan dei ha ki nongialam niam bad ha ka jingsngew shimet jong uno uno u briew, uba ngeit bad shaniah ialade ha kato ka niam bad kam dei ban ailad ban ia wohnia wohdaw, ia ka jingngeit jong kiwei pat bad ngi dei ban peit nuksa, ba ki jingjia kiba la jia ia U Salman Rushdie lane ki jingjia, kiba la jia ia ki kam ehrang jong ki ISIS lane ki Taliban, kim dei ban saphret kylleng pyrthei; namar ba lada kane ka jing isih niam, kan iai bteng, kumta ka thma, kaba triem duh, kan dei da ka thma niam.