Haba ki don kum kine ki jing ia kynad ha Bangladesh, kumta ka donkam, ba ngin pynleit jingmut ia ka jinglong jong ki khappud jongngi bad ia kaei kaba ka sorkar jylla, ka ieng ne ka kren baroh shi katta bad lada iakren ia katei ka mat, ngi lah ban ong, ba ka dei tang kane ka jylla, ka bym don nongmihkhmat sha ki khappud bad ka Bangladesh, kiba nud ban kren ia ka hok jong u paidlang lajong bad ban kdew beit beit sha ka sorkar India.
Khyndiat bnai mynshwa, ngi iohi, ba ki Mizo bad ki Naga, ki pyneh ia ka jingthmu jong ka sorkar India, na ka bynta ban ker sainar ia shi lynter u pud jong kitei ki jylla bad ka Myanmar, namar ba ki don ki para ri jongki, kiba sah sha katei ka ri ba sha khappud.
Mangi hangne, ngi don tang kawei ka jingpang bad kata ka long ka jingkwah pisa nokot bad ia ka jingshim jaka, kaba 150 yard, la shu pynbor bad pynbieit ia ki paidbah, da ka bor jong ka pisa bad ki paidbah ruh, ki ia bieit lem hi hangta bad katei ruh kam dei ba siew pisa ia ka 150, hynrei siew pisa tang ia ka 5 ne 10 yard, kaba iaid ka jingker sainar shiah, hynrei la ia tyrha mynsiem baroh baroh.Kam kut tang katta, mynta ia ki jaka kiba don sha shiliang u sainar, ym don uwei ruh uba leit ban pahara, lada dei u trai bri ne ki shipai khappud bad kumta ha ki sngi ki ban sa wan, ngin sa iohi, ia ki niuhmoh, ba kin sa kurup lut ia kitei ki jaka ba kin tei ia ki iing bah iing san, ki jaka rep jaka riang bad hangta kan paw sha ka pyrthei, ba ka jingker sainar shiah, ka nang pynheh ia u pud u sam ka Bangladesh bad ka nang pynrit ia ki jaka ki trai shnong khappud sha ri Khasi.
Ka jingker sainar shiah, hi ka dei ka jingkhanglad ia ki briew kiba bha, hynrei kam dei ka jingkhanglad ia ki nongtuh, ki nonglute, namar ba ki jingshisha, ki paw shai, ba ki khar Bangladesh, ki wan rung lyngba ki wah, lyngba ki thliew bad ki tar wat ia ki sainar shiah ruh bad halor kane ngi dei ban sngewthuh ba ki Khasi, kim dei kiba leit rung tuh sha Bang ladesh, hynrei, ki leit poi sha katei ka ri, na ka jingiakhlad jong ka India bad ka Pakistan ha u snem 1947 bad nangta ha ka jinglaitluid jong katei ka ri, ha u snem 1971 bad ki don la ki jong ki lyngkha ki risai bad ki don la ki jong ki iing ki sem sha ki shnong khappud, ha kaba ki leit ki wan bad ki wan thep vote ruh ha ki elekshon bapher; hynrei mynta da kane ka jingker sainar, ka leit ka wan, ka la khang lynti ia ki bad haba ka don ka saw ka sian, u sainar hi un sa wan rah ia ka iap ka duh ka mynsaw ka mynsnam, namar ba kim iohlad ban wan phai sha la ka ri.
Kito ki khyrdop, kiba don sainar shiah, ki shu bam sarang bad wat ki shabi ruh tharai kim don shuh, namar ba ym ju don ba plie, naduh ba thaw ia kitei ki khyrdop bad lyngba kane ka jingjia, ka donkam ban thaw bun tylli ki khyrdop, na ka bynta ba kin wan phai ki para ri sha la ki jong ki iing ki sem bad ka dei ruh ia ka sorkar Meghalaya, ba kan thawlad ia kitei ki para shnong, ba kin ioh ia ki special pass ba kin wan phai sha la ka ri bad kaba ngi dei ban sngewthuh ka long ruh ba kitei kim dei satia ki nongkhaii ksiar, ki nongkhaii masi ne ki nongkhaii shini.
Khyndiat bnai mynshwa ka sorkar Meghalaya, ka la leh burom ia U Tirot Singh ha Dhaka bad kumba ka burom ia utei u khla wait, ka dei ruh ban ithuh bad ban plie lad ia ki khla wait jong kane ka juk, kiba ieng ban iada ia la ka jong ka it ka hima, ka trei ka ktah bad ban pyndap ia la ka bam ka sa (khlem da leit kai khrong na kiwei pat), wat haba ka la hap sha kawei pat ka ri.
Ka jingjia ha Bangladesh, ka la dei ia u paid Khasi, ba un kyndit bynriew, ban iada ia la ki jong ki iing ki sem bad ki para ri, ha kano kano ka khep, kaba donkam, wat lada ki don sha kawei pat ka ri bad kumba ka BJP, ka pdiang sngewbha ia ki Hindu, kumta mangi ruh, ngi dei ban pdiang sngewbha, haba ki para ri, ki don ha kano kano ka kutlad.
Phi don ban ong eiei?