Ka kam shakri paidbah ne ka kam tuh?

La ju tip ia ki nongialam barim ka jylla, ba ki trei kam paidbah, kim ju thied iing, thied jaka, thied kali ba saw klur lane ba ki phah skul ia la ki khun sha ki skul kiba shongdor, da ki phew phew lak ha ka shisnem.

U bah HS Lyngdoh, U bah BB Lyngdoh, Bah GG Swell, Bah PR Kyndiah (nalor kiwei pat), ki la leit noh, hynrei kim shym buh ia ki iing remdor, ki kali remdor, ia la ki khun ki tnga jongki. Mynta pat, mar ia long MLA; khamtam lada ia long myntri sorkar, la ia bna, la ia thied jaka ha Police Bazaar, ha Laitum khrah, sha New Shillong, la tei iing ha Kolkata, Mumbai bad sa ki kali kiba shongdor da ki phew phew lak bad kane ka dei ka juk jong ka jinglong nongialam ha kine ki sngi.

Haba ka long ha kane ka dur, ka wan shisha kein ka jingmut, la ka kam nongmihkhmat paidbah, ka dei ka kam shakri ne ka dei ka kam tuh; hynrei kumba ka paw mynta, ka dei ka kam jyrsih bad ka kam shna pisa jong kito kiba don ha ka lakam synshar bad ka dei na kane kein ka jingleh ki nong ialam, ba ula ia bud sa u paidbah, ban iatuh bad ia dawa pisa man ka sngi, na ki nongmihkhmat. Ban ialeh pyrshah, ia kane ka la eh than; hynrei ka jingshisha, ka long ba u nongthep vote, u ioh bam shisien san snem, katba u nongmihkhmat, un ioh bam man ka sngi bad ngim tip, la ka don ne em ka ain ban pynduh jait, ia kane ka jingthaw pisa, na ka kam shakri paidbah; hynrei, haba shu peit, ngi iohi, ba kawei na kitei, ka long ban pynduh pyndam noh ia ka MLA Skhim, lane ban pynkylla noh ia ki kyndon jongka, ba kan nym don ka jing iasam pisa sha ki nongthep vote.

Ka jylla, ka la dap 50 snem ka rta jongka, ngi la dei ban kynmaw, ia kaei kaba ki nong ialeh hill state, ki la len ialade, na bynta ka jingsuk bad jinglong kyrpang jong ka jaitbynriew Khasi Pnar bad kumta, ka la dei ia ki riew shemphang, ki riew pyrkhat, ba kin iit ia ki nongshakri paidbah, ba kin long ki nongmihkhmat, ym ba kin iit ia ki nongkhaii, ia ki mahajon, ba kin rung sha dorbar jylla, na ka bynta ban iitlad ban khung tyngka tang ialade. Ki jingjia ha iing dorbar jylla, ha ka ophis pynieng bos ha Mawiong, ka jingtwa jong ki jingkieng bad ki surok; ka la dei ban pyn kyndit shkor ia u paidlang ka jylla, ha shwa ba ngin ia iam dier por, ynda haba ngin im sa tang ka shyieng bad ka snep.