Ka jingwan ba 180 snem U Thomas Jones

Ngi dang shu dep rakhe ia ka jingwan ba 180 snem jong U Thomas Jones, sha ka Ri Khasi ba ieid jongngi, ha kaba ula iuh kjat ha Sohra, ha ka 22tarik Jylliew, 1841.

Ngim tip, kumno ba u poi sha kane ka Ri jongngi, lehse, kaba dang sah dum shibun ha ka pule puthi bad ka jingstad jong kane ka juk kaba mynta bad khlem pep, ula mad ia ki jingeh kiba har rukom, ha ka lynti na Wales sha Sohra (ha kaba la antad, ba ka shimpor shiteng snem, ba un wan poi da ka jhad bad da ka kjat sha kine ki lum Khasi jongngi).
Hynrei, na bynta katei ka jingleit kaba shi arta bah, lah ban ong ba kam dei shuh, ka mynsiem jong U Thomas Jones, kaba ktik, ba un wan poi sha kane ka ri Khasi bad khlem pep, ka la dei ka jing ialam lynti jong U Blei, ba un wan sha kane ka Ri Khasi jongngi, na ka bynta ban leh ia ar tylli ki kam radbah bad kitei ki long (i) ban pynim ia ka ktien Khasi bad (ii) ban sdang ia ka balang Presbyterian.

Niuma, lada jia ba U Thomas Jones, um shym la wan iuh kjat ha katei ka snem, ban ai ia ki dak thoh, ha ka ktien Roman, kumta, mangi kum ka jaitbynriew, ngin dang long kumno ha kine ki sngi bad lehse, ngin dang sahdien ha ka thoh ka tar, ka jingnang jingstad bad wat ha ka jingtip ia ka balang Khristan bad kam dei tang katta, ka jinglah jongngi, ban thoh ha ki dak Roman, khlem pep, ka la plie lad iangi, ba ngin lah ban iasoh bad ka pyrthei hi baroh kawei, namar ba la buhti ha ngi, ia ki dak, kiba ngi suk ban thoh bad tip ia ka ktien English, kaba dei ka ktien jong ka pyrthei.
Ngi la ioh ia ka ktien bad ngi la nang la stad bad ngi la kiew ha ki kyrdan bapher bapher bad khlem pep, ngi hap ban ai nguh let ia utei u kpa jong ki dak Khasi, uba la pyn eh daw ia ka Ri Khasi, Jaintia jongngi bad kumjuh ia ka balang kmie jongu, kaba na Ri Wales, kaba la phah ba un wan ban mad ia ki raieh raidam sha kine ki lum Khasi.

Ka tnat pule puthi jong ka sorkar jylla, kam dei da lei lei ruh, ban klet ia ka jing shakri jong utei u sahep bad ka la dei ban pynshlur, ia ki samla jong kane ka juk, ba kin tip kham bha bad kham bun ia ki jingtrei ba radbah jong une u mishoneri bad ngi lah ban ong ba U Thomas Jones, um shym la wan ban jop thma, ban kurup jaka, ban thaw sorkar; kumba ki leh ki shipai phareng, hynrei, u dei u nongbsa ia ka jabieng jong ka jait bynriew, kumba ka long ha kine ki sngi.