Ka jingwad ia U Vickey Dey

Uwei u nong pynshit jait bynriew, U Vickey Dey, ula paw kyrteng bha ha kine ki sngi, ha kaba ka kyrteng jongu, ka la rung syndon ha ki sla jong ka jingthoh jingtar ha iing dorbar jylla bad kata ka long ba ki dkhot ka iing dorbar lem bad u myntri rangbah, ki la ia ktaid ia ka kyrteng jong utei u runar kynshoit briew, uba la iai pynshit mynta la shisnem kynthih.

Ha ki khyndiat taiew ba ladep, U Dey, ula sdang ban sangah sa ia ki heh ki hain (ym shuh ki riew paidbah) bad uwei na kitei, u dei U bah Sanbor Shullai, myntri ka sorkar Jylla, da ki ktien pynjah burom jongu bad da ka jing laitlan jongu, ban kren katba padiah u thylliej, un sa nang iai bteng nangne shakhmat, ban nion ia ki hein ki hain ka jylla, kumba ula dep nion ruh ia u myntri rangbah ka Mizoram.

Ka jing ia tai, kaba la mih ha ka sngi thohdieng, ka long, halor ka jing bym larkam ka tnat pulit, ban wad ia kum utei u riew pynshit bad ha ka jubab, u myntri rangbah, u iathuh ba ki pulit ka jylla, ki la thwet ia utei u runar, la shisnem duna, hynrei, kim shym la lap satia bad katei ka jubab, khlem pep, ka pyni, ba katei ka tnat, kam lah satia ban wad ia ka tynrai, kaba utei u briew, u shong u sah bad u shait pynmih ia ki khubor pynjah burom ia ka jylla.

Kaba lyngngoh ka long ba ki pulit ka Assam, ka Nagaland, ka Manipur bad ka Mizoram, haba don kum kine ki jingjia, ki ju leit beh mar mar ban kem bikar ia kitei kiba kren pynshit bad ka mat, ka long ba lada kitei ki lap, kumno pat ki pulit jong ka Meghalaya, ba kim lap lane ka la dei ia ki pulit ka jylla, ba kin pan jingmut ne shah hikai ia ka jingstad computer, na kitei ki marjan haneng.

Katei ka mat, kam dei kaba sting satia, namar ba ka jingma, ka don ia ki trai shnong ka jylla, kiba sah shabar, ba kin lah ban shah leh bein halor kitei ki jingkren pynbudnam da utei u runar bad kam dei tang kata, hynrei, lada jia ba ia utei u snar duh, ym shym la ioh ban pyn shitom, kumta kitei ki riew jrong thylliej, kin sa nang iai mih na ka por sha ka por bad kin thad madan ia ka jinglong jingim jong kane jait bynriew rit paid ha ka pyrthei bad kitei ki jait jingkren, ki plie lad ruh ia ki kam pynshit jait bynriew, kumba la iohi, ha ki jingjia ha Ichamati, them metor bad kiwei.