Ka jingtuh pisa ki kompeni mobile

Ka la mih ka jing iakren, na ka por sha ka por, halor ka jingleh mon ki kompeni mobile, ia ki nong pyn donkam mobile, kaba long hi thik, kum ka jingtuh kaba pyllein pyllein na ki paidbah, kiba pyn donkam ia kitei ki mobile phone bapher.

Ka nuksa, kaba shai, ka long ba lada phi kwah ban aplai sim card, da ka airtel, jio, cell one lane kano kano ka kompeni, kin pan ia ka dur jongphi, ka epic bad kiwei pat, hynrei kin nym kylli satia ia ka shnong ba phi sah bad kata ka dei ban long ha ka jing shisha, ka mat kaba donkam eh, khnang ba u nongbat mobile, un sngewthuh, la u shim ia ka sim card, kaba trei kam ne em ha ka shnong jongu.
Dei halor katei ka mat, ba ki ia bun ki nongbat mobile, ki ia kwah ban ia tynneng ka bat mobile, hynrei, kim ioh pat ban pyn donkam ia ka pisa, kaba ki la siew, ban thep card man ka taiew lane man u bnai bad haba kim ioh; katei ka pisa, ka la shu bam ei ka kompeni.

Ka la dei ia ka sorkar jylla, ba kan buh ia ki kyndon kiba shai, ba ka jingdie sim card, ka dei ban da pyni ia ki shnong, kiba katei ka card ka trei kam, namar kam don jingmut ia u briew, ba un buh ia ka jio mobile, lada ha ka shnong jongu, ka don da ka airtel lane ka cell one, vodaphone bad kiwei bad katei ka la dei ban long ka kyndon kaba kongsan bha; namar ba ki don da ki phew hajar ngut ki nongbuh mobile, kiba shah shet, ha ka T.100, T.200 ban shu thep kai ia ka pisa, katba kim ioh ban pynlut.
Ha kine ki sngi, ka jingbuh mobile, ka la dei kaba donkam bha, namar ba ka dei ka pyrthei online, ha kaba ki khynnah skul ruh, ki leit skul da ki mobile, ki kot ki sla, kiba donkam ha ki ophis, ki dei da ki mobile, nangta, ha kine ki sngi jong ka khlam corona, ka la mih sa ka jingbuh sngi injek ruh, ka dei hi lyngba ka mobile bad sa ki kot ki sla, hapoh Bank ruh, kiba hap leh, lyngba u number mobile bad ka la dei ka kamram jong ka sorkar India, kaba peit ia kane ka lain, ba kan pynmih ia ka hukum kaba tyngeh, ba ki mobile kompeni, kim dei ban shna pisa, hynrei, ki dei ban shakri hok sha u paidlang ka jylla.

Kam dei tang kata, ka la dei ba ki kompeni bapher, kin pyntip paidbah, ia ki jaka ba ki trei kam ki network jongki bad katei kan pynsuk ia u briew ha Balat, ba un shim da ka mobile, kaba don ha ka thain jongu bad kumjuh ia uba ha Dawki, ba un leh kumta hi.